ТОШКЕНТ, 11 сентябрь. /"Дунё" АА/. Ўзбекистон Вазирлар Маҳкамаси ҳузуридаги Бизнес ва тадбиркорлик олий мактаби томонидан Япониянинг МДҲ мамлакатлари ва Россия билан савдони ривожлантириш уюшмаси билан ҳамкорликда "яшил" иқтисодиётни ривожлантириш бўйича "Ўзбекистон – Япония" онлайн бизнес мулоқоти ташкил этилди, деб хабар қилмоқда "Дунё" АА мухбири.

Тадбирда Япониянинг "Sojitz Corporation", "Toyota Susho Corporation", "Nippon Steel Engineering Co., Ltd", "Fuji Electric Co., Ltd", "Mizuho Bank", "Mitsubishi Corporation", "Yokogawa Electric Corporation", "ITOCHU Corporation", "ATAGO Corporation", "Sansei Corporation" каби 50 дан ортиқ етакчи компаниялари ва мамлакат иқтисодиётининг турли тармоқларида фаолият юритувчи кўплаб компаниялар иштирок этди.

Тадбирни Япониянинг МДҲ мамлакатлари ва Россия билан савдони ривожлантириш уюшмаси ижрочи директори жаноб Киоичи Сузуки кириш сўзи билан очиб, иқтисодиётнинг турли тармоқларида "яшил" технологияларни жорий этиш ва ривожлантиришда Япония ва Ўзбекистон ўртасидаги икки томонлама ҳамкорликни кенгайтириш муҳимлигини таъкидлади. Шу билан бирга, Япония давлат ташкилотлари, саноат компаниялари ва банк-молия тузилмалари атроф-муҳитни сақлаш ва атмосферага карбонат ангидрид чиқиндиларини камайтиришни таъминлайдиган "яшил" технологиялар ва инновацион ишланмаларни ривожлантиришга қаратилган инвестиция лойиҳаларини амалга оширишда Ўзбекистон корхоналари ва ташкилотлари билан ишбилармонлик алоқаларини ўрнатишдан манфаатдор эканлиги қайд этилди.

Ўзбекистон Вазирлар Маҳкамаси ҳузуридаги Бизнес ва тадбиркорлик олий мактаби раҳбарияти бизнес-мулоқот иштирокчиларига Япония ва Ўзбекистон ўртасида "яшил" тараққиёт соҳасида тўғридан-тўғри алоқаларни ривожлантиришга муҳим ҳисса қўшадиган ва "яшил" иқтисодиёт соҳасида қўшма лойиҳаларни амалга оширишда давлат ташкилотлари ва мамлакатларимиз бизнес ҳамжамияти ўртасидаги ҳамкорликнинг янги уфқларини очадиган ушбу тадбирни ташкил этганлиги учун Япониянинг МДҲ мамлакатлари билан савдони ривожлантириш уюшмасига миннатдорлик билдирди.

Тадбирда Япониянинг углерод нейтраллигига эришиш йўлидаги энергетика сиёсати, Ўзбекистон билан "яшил" технологиялар соҳасида истиқболли ҳамкорлик, "яшил" иқтисодиётга ўтиш стратегиясини амалга ошириш ҳамда 2030 йилгача "яшил" ва инклюзив ўсишни таъминлаш бўйича устувор вазифаларга оид тақдимотлар ўтказилди.

Япония вакилларига Самарқанд вилоятида замонавий шаҳар муҳитини яратиш, шунингдек, Жиззах вилоятида қаттиқ маиший чиқиндилардан йўл плиталари ва пол қопламалари, қишлоқ жойларда органик чиқиндилардан биогаз ишлаб чиқариш бўйича стартап лойиҳалари тақдим этилди.

Тошкент кимё-технология институти ва Тошкент давлат техника университети ёш олимлари саноат эҳтиёжлари учун электротехника маҳсулотларини қайта ишлаш асосида кумуш нанозаррачалар олиш бўйича стартап лойиҳалари ва инновацион ишланмаларини ҳамда пластик чиқиндиларни қайта ишлаш асосида йўл қопламаларини олиш бўйича инновацион ишланмаларини тақдим этдилар.

Тадбир давомида ўзаро фикр алмашилди ва лойиҳалар муҳокама қилинди. Шунингдек, томонлар яқин келажакда Япониянинг манфаатдор бизнес компаниялари ва ташкилотлари инвестициялари иштирокида Ўзбекистондаги "яшил" лойиҳаларни янада қўллаб-қувватлаш бўйича фаол ҳамкорликни давом эттиришга келишиб олдилар.