ДЕҲЛИ, 21 октябрь. /"Дунё" АА/. Термизда ҳиндистонлик тадбиркорлар делегацияси билан муваффақиятли музокаралар бўлиб ўтди, деб хабар бермоқда "Дунё" АА мухбири.

Ушбу воқеа тоғ-кон саноати, олий таълим ва соғлиқни сақлаш соҳаларида қатор стратегик муҳим қўшма лойиҳаларни амалга оширишга старт берди.

Сурхондарё вилояти ҳокими Улуғбек Қосимовнинг "GlokalEuroasia" компанияси раҳбари Иқбол Муҳаммад бошчилигидаги делегация аъзолари билан учрашуви чоғида ҳудуднинг ижтимоий-иқтисодий ривожланишига салмоқли ҳисса қўшадиган келишувларга эришилди.

Қўшма саъй-ҳаракатларнинг асосий инвестиция лойиҳаси тоғ-кон саноати соҳасига тегишли бўлади. "GlokalEuroasia" Узун туманида мис қазиб олиш ва қайта ишлаш бўйича йирик лойиҳага ўз эътиборини қаратди.

Лойиҳанинг умумий қиймати 650 миллион доллар миқдорида баҳоланмоқда. Унинг доирасида ҳар йили 10 минг тонна мис қазиб олиш ва қайта ишлаш қувватига эга корхона ташкил этиш режалаштирилган.

Истиқболли ҳудудда геология-қидирув ишларининг дастлабки икки босқичи аллақачон муваффақиятли якунланган.

Мазкур лойиҳанинг ҳаётга тадбиқ этилиши вилоят аҳолиси учун 350 та янги иш ўрни яратиш имконини беради.

Тоғ-кон секторидан ташқари, ҳиндистонлик ҳамкорлар вилоятнинг ижтимоий инфратузилмасини ривожлантиришга ҳам жиддий қизиқиш билдирди. Музокаралар чоғида олий таълим ва соғлиқни сақлаш соҳаларидаги қўшма лойиҳалар муҳокама қилинди.

Ҳиндистонлик инвестор минтақага глобал тажриба ва халқаро таълим стандартларини олиб киришни, шу жумладан, бошқа мамлакатлардан талабаларни жалб қилишни ният қилган.

Вилоят ҳокимлиги ва "GlokalEuroasia" раҳбарияти янги муҳим ижтимоий ташаббусларни амалга ошириш учун техник-иқтисодий асосларни тезкорлик билан ишлаб чиқиш ва дастлабки келишувларни тайёрлаш ниятини тасдиқлади.

Музокараларнинг ушбу босқичи муваффақиятли якунлангани Ўзбекистондаги изчил ислоҳотларнинг бевосита натижаларини ҳамда Сурхондарё вилоятининг халқаро инвесторлар учун касб этаётган стратегик аҳамиятини намойиш этмоқда.

"GlokalEuroasia" фаолияти тоғ-кон саноатида йирик лойиҳаларни амалга оширишга йўналтирилган. Шунингдек, компания юқори сифатли таълим ва тиббиёт муассасаларини ривожлантиришда ҳам катта тажрибага эга.