КУАЛА-ЛУМПУР, 4 июнь. /"Дунё" АА/. Ўзбекистон элчиси Каромиддин Гадоев Малайзиянинг "Berjaya Land Berhad" компанияси бош ижрочи директори Сайид Али Шахул Хамид билан учрашув ўтказди, деб хабар қилмоқда "Дунё" АА мухбири.

Учрашув аввалида томонлар бугунги кунда Ўзбекистонда бунёдкорлик соҳаси жадал суръатларда ривожланаётганини урғуладилар. Шунингдек, Ўзбекистонда барпо этилаётган Янги Тошкент шаҳри, Самарқанд ва Бухоро шаҳарларида бунёд этилаётган янги "ақлли" шаҳарлар каби мега лойиҳаларда замонавий меҳмонхоналар ва дам олиш масканлари қурилишига сармоя киритиш имкониятлари юзасидан фикр алмашдилар.

Малайзия томони Ўзбекистонда кўчмас мулкни ривожлантириш, меҳмонхона бошқаруви йўналишларида биргаликда лойиҳаларни амалга ошириш ва мазкур соҳаларга инвестиция киритиш имкониятларини ўрганиб чиқишга қизиқиш билдирди.

"Berjaya Land Berhad" компанияси 1990 йилда ташкил этилган. Унинг асосий фаолияти Малайзия ҳудудида ва хорижий давлатларда қурилиш ҳамда кўчмас мулкни ривожлантириш, ушбу соҳаларга сармоя киритиш, меҳмонхоналар ва дам олиш масканлари, шунингдек, ўйинлар ва лотереяларни бошқариш, автомобиль савдосидан иборат. Мазкур компания Малайзиядаги "Berjaya Times Square" савдо ва кўнгилочар маскани, "Berjaya Tioman", "Berjaya Langkawi", "Redang Island" дам олиш масканлари, "Ritz-Carlton Residence" премиум турар-жой мажмуаси, "Berjaya Hills Golf & Country Club" гольф майдони, Япониядаги "Four Seasons Hotel" ва Вьетнамдаги "Sheraton Hanoi" беш юлдузли меҳмонхоналарига эгалик қилади. Унинг таркибида 44 та шуъба корхона бор ва уларда 5000 мингдан ортиқ ходим меҳнат қилади.