ИСЛОМОБОД, 9 июнь. /“Дунё” АА/. Покистоннинг “The Nation” нафузли газетасида Ўзбекистонда АЭСнинг биринчи энергия блоки қурилишига старт берилгани ҳақида мақола эълон қилинди, деб хабар бермоқда “Дунё” АА мухбири.

Мақолада Ўзбекистон ва Россия Президентлари мамлакатимизда интеграциялашган атом электр станциясининг биринчи энергия блокини қуриш ишларига старт бергани кенг ёритилган.

Ушбу йирик лойиҳа Ўзбекистон Президентининг Санкт-Петербург шаҳрида бўлиб ўтган 29-Петербург халқаро иқтисодий форумидаги иштироки доирасида амалга оширилгани қайд этилган.

“Шавкат Мирзиёев Владимир Путинга ушбу лойиҳани рўёбга чиқаришни қўллаб-қувватлагани ва кўрсатилган эътибор учун миннатдорлик билдирди. Ўзбекистонда биринчи атом электр станциясини барпо этишда иштирок этаётган икки давлат мутахассисларига биргаликдаги саъй-ҳаракатлари ҳамда юксак профессионаллиги учун алоҳида ташаккур изҳор этилди”, – дея баён этилган материалда.

Покистон нашри ёзилишича, мазкур лойиҳанинг амалга оширилиши Ўзбекистоннинг технологик, индустриал ва илмий тараққиётида янги босқични бошлаб бериб, янги тармоқ – атом энергетикасини ривожлантириш учун мустаҳкам замин яратади. Лойиҳа кичик модулли атом генерацияси ҳамда йирик ҳажмли энергетика соҳасидаги энг сўнгги ютуқларни ўзида мужассам этган.

Газетада ушбу улкан лойиҳанинг амалга оширилиши ва унинг натижалари Ўзбекистон–Россия кенг қамровли стратегик шериклик ва иттифоқчилик муносабатларини янада мустаҳкамлашга хизмат қилиши таъкидланган.