СЕУЛ, 10 ноября. /«Дунё» АА/. Олий Мажлис Сенати раиси Танзила Нарбаева бошчилигидаги Ўзбекистон парламент делегацияси Корея Республикаси Миллий Ассамблеяси спикери Чо Чон Шик таклифига биноан расмий ташриф билан Сеулга борди, деб хабар бермоқда “Дунё” АА мухбири.

Парламентимиз юқори палатаси маълумотига кўра, ташриф доирасида Корея Республикаси Миллий Ассамблеяси спикери Чо Чон Шик, “Корея – Ўзбекистон” парламентлараро ҳамкорлик бўйича гуруҳ раиси Ким Гё Хин ҳамда қатор давлат идоралари, таълим муассасалари ва йирик компаниялар раҳбарлари билан учрашувлар ўтказилиши режалаштирилган.

Учрашувларда икки мамлакат парламентлараро ҳамкорлигини янада мустаҳкамлаш, савдо-иқтисодий, инвестициявий, таълим, меҳнат ва инновациялар соҳаларидаги алоқаларни кенгайтириш масалаларини, сунъий интеллект ва ахборот технологиялари йўналишларида ўзаро ҳамкорлик истиқболларини муҳокама қилиш назарда тутилган.