НАМАНГАН, 24 май. /“Дунё” АА/. Бугун Наманганда очилган 65-Халқаро гуллар фестивали доирасида оммавий гул экиш акцияси “Guinness World Records” ташкилоти томонидан расман жаҳон рекорди сифатида эътироф этилди, деб хабар бермоқда “Дунё” АА мухбири.

Бугун бу ҳақдаги сертификатни Гиннеснинг рекордлар китоби расмий вакили ва ҳаками Шейда Субаши Наманганга топширди.

Наманган энг кўп гул экиш бўйича жаҳон рекордини ўрнатган ҳудуд сифатида тарихга кирди.

Таъкидлаш жоизки, Наманганнинг ташриф қоғозига айланган Халқаро гуллар фестивали бу йил 65-марта ўтказилиб, кўплаб хорижий меҳмонлар, халқаро ташкилотлар вакиллари ва соҳа мутахассисларини бирлаштирди.