МАДРИД, 28 июнь. /"Дунё" АА/. Ўзбекистон элчихонаси кўмагида "Ўзчармсаноат" уюшмаси делегациясининг Испанияга амалий сафари ташкил этилди, деб хабар беради "Дунё" АА мухбири.

Сафар давомида Испаниянинг терини қайта ишлаш ассоциацияси (ACEXPIEL) билан музокаралар чоғида чарм саноатида экологик барқарорликни таъминлаш, жумладан, чиқиндиларни камайтириш, ишлаб чиқариш қолдиқларини қайта ишлаш ва қайта ишлашнинг замонавий технологияларини жорий этиш масалалари муҳокама қилинди.

Томонлар, шунингдек, "ACEXPIEL" аъзоларининг Ўзбекистондаги терини қайта ишлаш корхоналарини модернизация қилишда, жумладан, технологик янгилаш, экологик стандартлар ва маҳсулдорликни оширишда иштирок этиш истиқболларини кўриб чиқдилар.

Ўзбекистон ва Испания ўртасидаги илмий-техникавий ҳамкорликни ривожлантириш, жумладан, қўшма илмий изланишлар олиб бориш, ҳар икки мамлакат чарм саноати мутахассислари учун мавзули маҳорат дарслари, семинар ва амалий машғулотлар ташкил этишга алоҳида эътибор қаратилди.

"Ўзчармсаноат" уюшмаси ва "ACEXPIEL" компанияси ўртасидаги музокаралар якунида узоқ муддатли ва ўзаро манфаатли ҳамкорликни ривожлантиришга қаратилган англашув меморандуми имзоланди.

Испания чарм кимёгарлари ассоциацияси вакиллари билан учрашувда томонлар замонавий кимёвий материаллардан фойдаланиш, экологик тоза технологиялар ва чарм саноатида барқарор ишлаб чиқариш бўйича тажриба алмашди.

"Ўзчармсаноат" уюшмаси делегацияси Европадаги энг йирик ва технологик жиҳатдан илғор чарм кластерларидан бири – "Leather Cluster Barcelona – Igualada Hub"га ҳам ташриф буюрди. Ўзбекистонда ишлаб чиқариш занжирини бошқариш самарадорлигини ошириш, компаниялар ўртасидаги ҳамкорликни рағбатлантириш ва экспорт салоҳиятини ошириш имконини берувчи ана шундай кластер моделини жорий этиш юзасидан маслаҳатлашувлар бўлиб ўтди.

Бундан ташқари, кластер томонидан Барселонада ўтказиладиган кўргазмалар, семинарлар ва тренингларда Ўзбекистон компанияларнинг иштирокини таъминлаш имкониятлари муҳокама қилинди. Бу эса ўзбек ишлаб чиқарувчилари маҳсулотларини илгари суриш, касбий тажрибани кенгайтириш ва европалик ҳамкорлар билан тўғридан-тўғри алоқаларни йўлга қўйиш учун янги уфқларни очади.

Музокаралар давомида Ўзбекистон томони "ACEXPIEL", "AQEIC" ва "Leather Cluster Barcelona" вакилларини мамлакатимиз чарм саноатининг ҳолати ва салоҳияти билан танишиш, шунингдек, 2025 йил октябрь ойида бўлиб ўтадиган халқаро тўқимачилик кўргазмасида иштирок этиш учун юртимизга таклиф қилдилар.