ВЕНА, 16 сентябрь. /"Дунё" АА/. Вена шаҳрида Атом энергияси бўйича халқаро агентлик (МАГАТЭ) Бош конференциясининг 69-сессияси доирасида Ўзбекистон ва МАГАТЭ ўртасида ҳамкорлик бўйича "йўл харитаси" имзоланди, деб хабар қилмоқда "Дунё" АА мухбири.

Ҳужжат МАГАТЭ бош директори Рафаэль Гросси ва Ўзбекистон энергетика вазири Жўрабек Мирзамаҳмудов томонидан имзоланди.

"Йўл харитаси" ҳамкорликнинг стратегик йўналишларини белгилаб, миллий атом энергетикаси инфратузилмасини ривожлантириш, тиббиёт, қишлоқ хўжалиги ва экологияда ядро технологияларидан фойдаланишни кенгайтириш, ядро ва радиация хавфсизлигини ошириш, шунингдек, миллий кадрларни тайёрлаш ва қайта тайёрлаш каби вазифаларни қамраб олади.

Мазкур ҳужжатнинг имзоланиши Ўзбекистон Президенти Шавкат Мирзиёевнинг МАГАТЭ Бош директорининг 2024 йил декабрь ойида Тошкентга ташрифи чоғида илгари сурилган ташаббусининг амалий ижроси бўлди.

Маросимда Рафаэль Гросси Ўзбекистон Агентликнинг минтақадаги муҳим ва ишончли ҳамкори эканини таъкидлаб, қўшма лойиҳалар муваффақиятли амалга оширилишига ишонч билдирди.

Делегация раҳбари мазкур келишув мамлакат энергетика соҳасини модернизация қилиш, илғор технологияларни жорий этиш ва кадрлар салоҳиятини мустаҳкамлаш учун янги имкониятлар очаётганини алоҳида таъкидлади.