ЛОНДОН, 22 май. /"Дунё" АА/. Ўзбекистон Бош вазирининг ўринбосари Жамшид Ходжаев бошчилигидаги мамлакатимиз делегация Европа тикланиш ва тараққиёт банкининг Лондонда бўлиб ўтган 34-йиллик йиғилишида иштирок этди, деб хабар қилмоқда "Дунё" АА мухбири.

Бу йилги анжуман "Истиқболларни кенгайтириш, мустаҳкам кучларни сақлаш" мавзусида ташкил этилди. Панель сессияларда иқлим, энергетик хавфсизлик, геосиёсат ва геоиқтисодиёт, нодавлат ташкилотларнинг бизнес муҳитни яхшилашдаги роли, сув ресурсларидан оқилона фойдаланиш каби масалалар муҳокама қилинди.

Бошқарув кенгашининг пленар сессиясида Ўзбекистон делегацияси раҳбари маъруза қилди. Унда Ўзбекистон ва ЕТТБ ўртасидаги ҳамкорликнинг ҳолати ва истиқболларига тўхталиб ўтилди.

Ўзбекистон делегацияси ташриф доирасида EТТБ президенти Одиль Рено-Бассо билан учрашди.

Таъкидлаш керакки, Ўзбекистон минтақада EТТБ маблағларини энг кўп олаётган давлат ҳисобланади. Банк ҳозирга қадар мамлакатимизга 174 та лойиҳага жами 5,5 миллиард АҚШ доллари миқдорида сармоя киритган. Жорий портфель 3 миллиард доллар қийматдаги 95 та лойиҳадан иборат.

Шунингдек, Буюк Британия энергетика хавфсизлиги ва углерод нейтраллик вазирлиги, Экспортни молиялаштириш агентлиги, "Standart Chartered" банки, "International Hospitals Group", "United Green Group" ва "Rolls-Royce" каби йирик компаниялар раҳбарияти билан музокаралар ўтказилди.