КУАЛА-ЛУМПУР, 3 июль. /"Дунё" АА/. Жорий йилнинг 30 июнь - 1 июль кунлари Малайзиянинг Ислом цивилизацияси институтида Ўзбекистон томони билан ҳамкорликда "Донишмандлик кўприги: Мусулмон оламининг илм, фалсафа ва силсилага қўшган ҳиссаси" номли бешинчи илмий-амалий семинар ташкил этилди, деб хабар қилмоқда "Дунё" АА мухбири.

Тадбирнинг расмий очилиш маросимида Малайзия Миллий университети проректори Файсал Муҳаммад, Малайзиянинг Ислом цивилизацияси институти директори Фариза Шам ва Ўзбекистон халқаро исломшунослик академияси ректори Музаффар Комилов, Ўзбекистон элчиси Каромиддин Гадоев, Ўзбекистондаги Ислом цивилизацияси маркази раҳбарияти, Имом ал-Бухорий, Имом ат-Термизий ва Имом Мотуридий илмий-тадқиқот марказлари вакиллари иштирок этди.

Ўзбекистон халқаро исломшунослик академияси ректори Музаффар Комилов ўз чиқишида иштирокчиларга мамлакатимизда диний-маърифий соҳада амалга оширилаётган ислоҳотлар ҳақида батафсил маълумот берди. У ёш тадқиқотчиларни илм орқали жамиятда бағрикенглик ва бирдамлик ғояларини кенг тарғиб қилишга ва бу борадаги икки томонлама олимлар ва тадқиқотлар алмашинувларини кенгайтиришга чақирди.

Ўзбекистон элчиси Каромиддин Гадоев Ўзбекистон ҳудудида етишиб чиққан буюк аллома ва мутафаккирларимизнинг нафақат ислом олами, балки дунё илм-фани ва цивилизацияси равнақига қўшган беқиёс ҳиссаси ҳақида тўхталди. Улуғ аждодларимизнинг бой илмий меросини биргаликда ўрганиш ва ўзлигимизни, тарихимизни ёш авлодларга етказиш давлатимиз раҳбари томонидан илгари сурилган Янги Ўзбекистон ва Учинчи Ренессансни қуриш йўлидаги муҳим қадам эканлигини алоҳида таъкидланди.

Икки кун давом этган ушбу семинар "Сиёсий фанлар, сиёсий фалсафа ва ахлоқий бошқарув" ва "Математика, астрономия ва тиббий инновациялардаги инқилобий янгиликлар" каби сессияларни ўз ичига олди. Унда 50 га яқин ислом дунёси олимлари ўзларининг 27 та тадқиқотлари билан иштирок этди.

Таъкидлаш жоизки, буюк ислом цивилизацияси олимлари бой илмий меросини ўрганишга қаратилган ушбу қўшма тадқиқот платформаси 2020 йилда ташкил этилган бўлиб, унинг тўртинчи семинари 2024 йилда Тошкент шаҳрида ўтказилган.

Ўзбекистон Президентининг жорий йил февраль ойидаги Малайзияга расмий ташрифидан сўнг мазкур йўналишдаги ҳамкорлик янада жадаллашди.

Фариза Шам, Малайзиянинг Ислом ҳадлари (цивилизацияси) институти директори:

– Анъанамизга содиқ қолган ҳолда бешинчи маротаба Ислом цивилизацияси уламолари семинарини янги "Донишмандлик кўприги: Мусулмон оламининг илм, фалсафа ва силсилага қўшган ҳиссаси" мавзусида ўтказдик.

Бундан беш йил аввал Ўзбекистон томони билан ўзаро англашув меморандумини имзолаш орқали бошланган ҳамкорлигимиз бугун доимий мулоқот ва тадқиқот платформасига айланиб улгурди.

Ҳозирда Ислом ҳадҳари институти Ўзбекистондаги бир қанча нуфузли институтлар яқин ҳамкорликда ишлаб келмоқда.

Ўзбекистон элчихонаси кўмаги билан ташкил этилган ушбу семинар мусулмон олимлари, ўқитувчилари ва тадқиқотчилари учун илм-фан, технология, дин, психология, жамият, фиқҳ, ҳадис ва тафсир каби турли соҳаларда мусулмон алломаларининг буюк илмий меросини ўрганиш ва қайта кўриб чиқиш учун муҳим платформа бўлиши билан жуда аҳамиятлидир.

Ислом цивилизациясининг олтин давридаги мусулмон олимлари илм ривожига катта таъсир кўрсатди ва бу ҳиссаларни замонавий шароитда яна бир бор ўрганиш биз учун жуда муҳимдир.

Умид қиламизки, мумтоз ислом қўлёзмаларида қайд этилган назариялар, тамойиллар ва билимлар бугунги авлод томонидан қайтадан кашф этилади ва чуқур ўрганилади. Бу бизнинг интеллектуал меросимизни асраб-авайлаш ва унинг мусулмон умматига фойда келтиришда давом этишига ёрдам беради.

Семинар натижалари икки мамлакат институтлари ўртасида ўзаро манфаатли тадқиқот ишларини яратилишига, китоблар ва мақолалар чоп этилишига, шунингдек Малайзия ва Ўзбекистон ўртасидаги ходимлар ва талабалар алмашинуви дастурлари орқали академик алоқаларни янада мустаҳкамлашга хизмат қилади.