ҚОҲИРА, 6 ноябрь. /«Дунё» АА/. Миср ҳукумати томонидан мамлакатимиз учун инсонпарварлик ёрдами тариқасида ажратилган С гепатитига қарши «Sofosbuvir-400mg» дори воситасининг навбатдаги туркуми Тошкентга жўнатилди, деб хабар бермоқда «Дунё» АА мухбири.

Ушбу лойиҳа Ўзбекистон Президентининг Мисрга амалга оширган расмий ташрифи давомида эришилган келишувлар ҳамда мамлакатимиз раҳбарининг С Гепатитига чалинган беморларни 100 фоиз давлат ҳисобидан даволаш бўйича ташаббуси ижроси доирасида амалга оширилмоқда.

«Sofosbuvir-400mg» дори воситасининг навбатдаги туркумини Ўзбекистонга жўнатиш бўйича келишув мамлакатимиз дипломатларининг Миср соғликни сақлаш вазири билан олиб борган самарали музокаралари натижасидир.

Миср ҳукумати томонидан мамлакатимизга инсонпарварлик ёрдам сифатида ажратилган С гепатитига қарши  «Sofosbuvir-400mg» дори воситаларининг ўн еттинчи партияси шу йил 4 ноябрь куни «Uzbekistan Airways» авиакомпанияси кўмагида Шарм аш-Шайхдан Тошкентга етказиб берилди.