МОСКВА, 7 март. /"Дунё" АА/. Москва вилояти марказий кўчаларидаги катта экранларда Ўзбекистон ҳақидаги видеолавҳалар намойиш этиляпти, деб хабар қилмоқда "Дунё" АА мухбири.

Хусусан, жорий март ойидан бошлаб Москва вилояти шаҳарлари марказларидаги энг гавжум чорраҳаларда, сайёҳлар энг кўп келадиган машҳур майдонлардаги экранларда Ўзбекистоннинг бой маданий мероси, сайёҳлик салоҳияти ва замонавий қиёфасига бағишланган видеолавҳалар намойиши йўлга қўйилди.

"Ўзбекистонга хуш келибсиз" шиори остидаги лавҳаларда Москва вилояти аҳолиси ва меҳмонлари эътиборига юртимиздаги қадимий обидалар, дунёга машҳур масжидлар, мадрасалар ва миноралар ҳамда Самарқанд, Бухоро, Хива ва Шаҳрисабз каби тарихий шаҳарларимиз ҳақидаги муҳим маълумотлар тақдим этиляпти.

Юртимиз ҳақидаги видеоматериаллар март ойи давомида 24 соат ушбу экранлар орқали кўрсатилади.

Мазкур лойиҳа Ўзбекистон элчихонаси ташаббуси билан Москва вилояти ҳукумати кўмагида амалга оширилмоқда.