БАНГКОК, 15 декабрь. /"Дунё" АА/. Ўзбекистон бош консули Фахриддин Султонов Таиланд Марказий ислом кенгаши раисининг ўринбосари Абдуллаҳ Ноомсук билан учрашди, деб хабар қилмоқда "Дунё" АА мухбири.

Учрашувда, шунингдек, "Uzbekistan Airways" АЖнинг Бангкокдаги ваколатхонаси ва миллий сайёҳлик компаниялари вакиллари иштирок этди. Таиланд томонига Ўзбекистоннинг зиёрат туризми, инвестициявий ва савдо имкониятлари ҳақида сўзлаб берилди.

Ўзбекистон ва Таиланд ўртасидаги ҳамкорликни, хусусан, таълим, маънавий-маърифий ва маданий алмашинув соҳаларида кенгайтириш учун юқори салоҳият мавжудлиги таъкидланди.

Мулоқот якунида икки давлат ўртасида маданий алоқаларни кенгайтириш ва бизнес имкониятларини ривожлантириш мақсадида Таиланд мусулмонлари етакчилари ва ишбилармон доиралари делегациясини Ўзбекистонга сафарини ишлаб чиқиш юзасидан келишиб олинди.

Марказий Ислом Кенгаши – Таиланддаги ислом дини ишлари бўйича асосий бошқарув органи ҳисобланади. Кенгаш исломий ташкилотларни бошқариш ва мамлакат мусулмонлари манфаатларини миллий даражада ифодалаш учун масъулдир.