TOSHKENT, 19-noyabr. /"Dunyo" AA/. O'zbekiston Tashqi ishlar vaziri o'rinbosari Muzaffar Madrahimov Vengriyaning O'zbekistondagi Favqulodda va muxtor elchisi Yojef Roja bilan uchrashdi, deb xabar bermoqda "Dunyo" AA muxbiri.

TIV ma'lumotiga ko'ra, uchrashuvda o'zbek-vengriya hamkorligining hozirgi holati va istiqbollari, siyosiy, savdo-iqtisodiy hamda madaniy-gumanitar sohalar, 2026-yilga mo'ljallangan rejalar muhokama qilindi.

Tomonlar O'zbekiston va Vengriya o'rtasidagi kengaytirilgan strategik sheriklikni yana-da mustahkamlash va hamkorlikni amaliy mazmun bilan boyitishni qo'llab-quvvatlagan.

Muloqot jarayonida bir qator qo'shma tadbirlarni o'tkazish, jumladan, tashqi siyosat idoralari o'rtasida siyosiy maslahatlar, savdo-iqtisodiy hamkorlik bo'yicha Hukumatlararo komissiyaning navbatdagi majlislari, ishbilarmonlar kengashi, hududlar va universitet rektorlarining forumlarini tashkil etish bo'yicha kelishuvlarga erishildi.