TOSHKENT, 23-iyun. /"Dunyo" AA/. O'zbekiston Transport vazirligi tomonidan Savdo-sanoat palatasi bilan hamkorlikda "O'zbekiston – Qirg'iziston – Xitoy – Mo'g'uliston" koridori bo'ylab birinchi pilot yuk tashuvini tashkil etildi, deb xabar qilmoqda "Dunyo" AA muxbiri.

Trasport vazirligi ma'lumotiga ko'ra, mazkur pilot yuk tashuvi mamlakatimiz tadbirkorlari tomonidan ishlab chiqarilgan mahsulotlarni yangi bozorlarga olib chiqish, avtomobil transportida yangi koridorlarda yuk tashuvlarini yo'lga qo'yish maqsadida amalga oshirildi.

Murakkab relyefli Oltoy tog'lari bo'ylab o'tgan mazkur koridor ayrim qismlari dengiz sathidan 1500 metr balandlikkacha ko'tariladi. O'zbek milliy tashuvchisi tomonidan 4500 km masofa 8 kunda bosib o'tildi.

Ishtirokchi davlatlar o'rtasidagi samarali hamkorlik va ushbu transport yo'lagini rivojlantirish bo'yicha qo'shma sa'y-harakatlar natijasida savdo aylanmasi o'sishi va transport-logistika aloqalarining kengayishi uchun yangi istiqbollar ochilmoqda.

Ushbu yo'nalish davlatlar o'rtasida eksport va import yuk tashuvlari hajmini oshirishga, savdo aloqalari geografiyasini kengaytirishga hamda tovarlarni yetkazib berish muddatlarini qisqartirishga xizmat qiladi.

Dunyo logistika bozoridagi vaziyatni inobatga olganda, mazkur koridorning rivojlanishi o'zbek milliy tashuvchilari uchun o'z biznesini kengaytirish, samaradorlikni oshirish hamda mintaqaviy va global darajadagi o'rinlarni mustahkamlashda muhim ahamiyatga ega.