LONDON, 3-may. /"Dunyo" AA/. O'zbekiston iqtisodiyot va moliya vaziri o'rinbosari Xurshed Mustafayev boshchiligidagi mamlakatimiz delegatsiyaning Londonga tashrifi doirasida "O'zbekneftgaz" AJning 5 yillik katta nominalli obligatsiyalarini chiqarishga erishildi, deb xabar qilmoqda "Dunyo" AA muxbiri.

Qimmatli qog'ozlar Buyuk Britaniya, AQSh, Yevropa, Osiyo davlatlarining yuqori reytingli investorlari tomonidan katta qiziqish bilan qarshi olindi. Natijada 1,9 milliard AQSh dollariga teng buyurtmalar jalb etildi. Yuqori talab evaziga emissiya hajmi rejadagidan ko'proq – 850 million AQSh dollarigacha oshirildi. Bu O'zbekiston tarixida yagona transh formatda amalga oshirilgan eng yirik obligatsiya emissiyasi bo'ldi.

Bitim "J.P. Morgan", "Standard Chartered Bank" kabi yetakchi moliyaviy institutlar va "O'zsanoatqurilishbank"ning hamkorligida amalga oshirildi.

Kompaniya obligatsiyalari London fond birjasining Xalqaro qimmatli qog'ozlar bozorida (ISM) ro'yxatdan o'tkaziladi.

Ushbu tarixiy voqea xalqaro investorlarning O'zbekiston iqtisodiyotiga va davlat kompaniyalariga bo'lgan yuksak ishonchini yana bir bor tasdiqlaydi.