LONDON, 14-iyun. /"Dunyo" AA/. Buyuk Britaniya poytaxtida harakatlanadigan ikki qavatli avtobuslarda "O'zbekistonga xush kelibsiz" mavzusidagi reklama bannerlari joylashtirildi, deb xabar qilmoqda "Dunyo" AA muxbiri.

Mazkur loyiha yurtimiz elchixonasi tashabbusi bilan joriy yilning 21-22-iyun kunlari "Tower Bridge" maydonida tashkil etiladigan "O'zbekiston madaniyati va milliy taomlari" festivali arafasida tashkil etildi.

Aksiya mamlakatimizning boy madaniy merosi, sayyohlik manzillarini va gastronomik an'analarini xalqaro maydonda keng targ'ib qilishda muhim qadam bo'ldi. Shuningdek, bu kabi madaniy tadbirlar O'zbekistonning xalqaro nufuzini mustahkamlash, turizmni rivojlantirish va madaniy aloqalarni yuksaltirishda ham ulkan ahamiyatga ega.

Bundan tashqari, ayni paytda "O'zbekiston karvoni" madaniyat va taomlari festivali Buyuk Britaniyaning 6 ta shahrida, jumladan Edinburg, Manchester, Liverpul, Kardiff, Oksford va Londonda davom etmoqda.