SUCHJOU, 17-dekabr. /“Dunyo” AA/. Xitoy Xalq Respublikasining Suchjou shahrida tashkil etilgan “O‘zbekiston turizmi Xitoyda” nomli xalqaro forumda Namangan viloyati hokimi o‘rinbosari Botir Nuritdinov boshchiligidagi delegatsiya ham qatnashdi, deb xabar qilmoqda “Dunyo” AA muxbiri.

Avval xabar berganimizdek, Namangan viloyati hokimligi delegatsiyasi Xitoyda bo‘lib, turli yo‘nalishlarda uchrashuvlar o‘tkazib, ko‘plab shartnoma va kelishuvlarga erishmoqda.

Tashrifning ikkinchi kuni vakillarimiz Suchjou shahrida bo‘lib o‘tgan “O‘zbekiston turizmi Xitoyda” nomli xalqaro forumda ishtirok etdi. Forum davomida turizm sohasini rivojlantirish, xorijiy investitsiyalarni jalb etish, ikki tomonlama hamkorlikni kengaytirish masalalari muhokama qilindi. Tadbir ishtirokchilariga Namangan viloyatining investitsion salohiyati, turistik imkoniyatlari va hududda amalga oshirilayotgan yirik loyihalar taqdim etildi.

Xitoy ishbilarmon doiralari hamda turizm sohasi vakillari 2026-yilda Namangan viloyatida o‘tkaziladigan 65-xalqaro “Gullar festivali”ga taklif etildi.

Forum doirasida turizm sohasida hamkorlikni kengaytirishga qaratilgan memorandum imzolandi. Jumladan, “Communication Department of Suzhou Heping International Travel Agency Co., Ltd.” kompaniyasining Xalqaro aloqalar departamenti bosh menejeri Xu Li xonim bilan ikki hudud o‘rtasida turistik oqimni oshirish hamda Namangan viloyatiga sayyohlarni jalb etish bo‘yicha o‘zaro hamkorlik memorandumi imzolandi.

Tadbir doirasida viloyat hokimi o‘rinbosari Botir Nuritdinov Namangan viloyatining turizm imkoniyatlari va investitsiya salohiyatiga bag‘ishlangan maxsus taqdimot o‘tkazdi.