ВАШИНГТОН, 1 сентябрь. /"Дунё" АА/. АҚШ пойтахти мэри Муриел Баузер мамлакатимиз мустақиллигининг 33 йиллигини юксак шарафлаб, ушбу кунни Вашингтонда "Ўзбекистон мустақиллиги куни" сифатида расман эълон қилди, деб хабар бермоқда "Дунё" АА мухбири.

Мазкур эътироф нафақат юртимиз мустақиллигига бўлган ҳурмат, шу билан бирга, ўзаро мустаҳкамланиб бораётган Ўзбекистон ва АҚШ муносабатлари ҳамда Америка пойтахтидаги ўзбек жамоатчилиги фаолиятига бўлган юксак эҳтиромдан далолатдир.

Вашингтон шаҳри мэри Ўзбекистон Мустақиллик кунининг аҳамиятини таъкидлаб, Америка Қўшма Штатлари Ўзбекистон мустақиллигини биринчилардан бўлиб тан олганлигини қайд этди.

Қўшма Штатлар пойтахтида 1 сентябрнинг Ўзбекистон Мустақиллиги куни деб эълон қилиниши икки давлат ўртасидаги муносабатлар тобора мустаҳкамланиб бораётганининг ифодасидир. Сўнгги йилларда шаклланган ҳамкорлик ўзаро стратегик шериклик муносабатларининг ёрқин намунаси бўлиб, турли соҳаларда ҳамкорликнинг янада кенгайишига хизмат қилмоқда.

Мэрнинг махсус баёнотига кўра, АҚШ ва Ўзбекистон кўплаб соҳаларда, жумладан, чегара ва минтақавий хавфсизлик дастурлари, маданий ва гуманитар ҳамкорликни мустаҳкамлаш, инглиз тилида таълим беришни ривожлантириш бўйича мустаҳкам, ўзаро манфаатли ҳамкорликни кенгайтирмоқда. Шунингдек, Ўзбекистонда амалга оширилаётган кенг кўламли иқтисодий ва сиёсий ислоҳотлар алоҳида мамнуният билан қўллаб-қувватланмоқда.

Баузер хоним сўзларига кўра, Ўзбекистон элчихонаси икки томонлама муносабатларни ривожлантиришда муҳим роль ўйнамоқда. Пойтахт мэри икки мамлакат ўртасидаги шахслараро алоқаларни кенгайтириш ва маданий алмашинувни ривожлантириш борасида сезиларли ютуқларга эришилганини алоҳида таъкидлади.

"Вашингтон шаҳри Америка Қўшма Штатларининг пойтахти сифатида Ўзбекистон мустақиллиги ва унинг жаҳон миқёсидаги аҳамиятини катта ҳурмат билан эътироф этади", - дея таъкидлади АҚШ пойтахти мэри.

Эслатиб ўтамиз, АҚШ пойтахти 1791 йилда ташкил этилган ва Американинг биринчи президенти Жорж Вашингтон шарафига номланган. Вашингтон шаҳрида давлат ҳокимиятининг барча уч тармоғи, хусусан, АҚШ Президенти қароргоҳи, Оқ уй, шунингдек, кўплаб маданий ёдгорликлар ва музейлар жойлашган. Шаҳарда юзлаб элчихоналар, Жаҳон банки, Халқаро валюта жамғармаси, Америка давлатлари ташкилоти, Америкалараро тараққиёт банки ва Панамерика соғлиқни сақлаш ташкилотининг бош қароргоҳлари ўрин олган.