ОСЛО, 4 февраль. /“Дунё” АА/. Норвегия парламенти монархияни бошқарув шакли сифатида сақлаб қолиш учун овоз берди: 169 депутатдан 141 нафари қирол Харальд ва унинг авлодлари бошқарувини сақлаб қолишни қўллаб-қувватлади, 26 нафари эса уни тугатиш тарафдори бўлди, деб хабар бермоқда “Дунё” АА мухбири Норвегиянинг “NRK” телерадиокомпаниясига таяниб.

Монархия тарафдорларининг таъкидлашича, институт партия сиёсатидан ташқарида бўлган ҳолда барқарорликни таъминлайди ва 1905 йилда Швециядан мустақилликка эришгандан бери мамлакатга хизмат қилмоқда. Шу билан бирга, бошқарувнинг республика шаклини қўллаб-қувватловчилар сиёсий ҳокимият аллақачон парламент ва ҳукуматга тегишли эканини ва қироллик оиласининг меросий имтиёзлари демократик жамиятда мавжуд бўлмаслиги кераклигини таъкидлайди.

“NRK” сўровига кўра, аҳоли орасида монархияни қўллаб-қувватлаш камайиб бормоқда: сўралганларнинг 66 фоизи уни қўллаб-қувватлайди, бу икки ҳафта олдингига нисбатан 4 фоизга кам. Бундан ташқари, респондентларнинг 76 фоизи валиаҳд малика Метте-Маритга бўлган ишончнинг пасайганини маълум қилган.

Гап шундаки, кеча валиаҳд маликанинг тўнғич ўғли Мариус Борг Хёйбига 38 та айблов, жумладан, зўрлаш айблови қўйилган. У ўн йилгача озодликдан маҳрум этилиши мумкин. Жамоатчилик эътиборини, яқинда малика Метте-Маритнинг педофилияда айбланган америкалик тадбиркор Жеффри Эпштейн билан алоқалари ҳақидаги хабарлар ҳам тортди.