НЬЮ-ЙОРК, 12 июль. /"Дунё" АА/. 10 июль куни Нью-Йорк шаҳрида Ўзбекистон ва Эритрея ўртасида дипломатик муносабатлар ўрнатиш тўғрисида Қўшма коммюнике имзоланди, деб хабар қилмоқда "Дунё" АА мухбири.

Ҳужжатни икки давлат ҳукуматлари номидан Ўзбекистоннинг БМТдаги доимий вакили Улуғбек Лапасов ва Эритреянинг БМТдаги доимий вакили София Тесфамариам имзолади.

Томонлар халқаро ташкилотлар, жумладан, БМТ ва унинг ихтисослашган муассасалари доирасида қўшма ҳамкорликни мустаҳкамлашга тайёр эканликларини билдирдилар.

Сиёсий, савдо-иқтисодий ва маданий-гуманитар соҳаларда ҳамкорликнинг ўзаро манфаатли йўналишларини топиш учун икки томонлама алоқаларни фаоллаштириш бўйича келишувга эришилди.

Ҳужжатнинг имзоланиши Ўзбекистоннинг Африка қитъаси билан ўзаро ҳамкорлигини фаоллаштиришда муҳим қадам бўлди.

Шу тариқа, Африканинг шимоли-шарқида жойлашган Эритрея давлати Ўзбекистон билан дипломатик муносабатлар ўрнатган 162-давлат бўлди.