ВАРШАВА, 17 июнь. /"Дунё" АА/. Польшанинг нуфузли "www.bankier.pl" ва "www.wnp.pl" электрон порталларида "Польшалик инвестор: жорий ва кейинги йил Ўзбекистонга инвестиция киритиш учун энг қулай вақт" сарлавҳали мақолалар эълон қилинди, деб хабар қилмоқда "Дунё" АА мухбири.

Уларда Ўзбекистонда сўнгги йилларда хорижий инвесторлар учун яратилаётган имкониятлар ва жорий ҳамда келаси йиллар мамлакатимизга инвестиция киритиш учун энг яхши давр эканлиги таъкидланган.

"Ўзбекистонда бир неча йилдан буён изчил ислоҳотлар дастури амалга оширилмоқда, унинг элементларидан бири хусусийлаштириш, жумладан энергетика соҳасини хусусийлаштиришдир. Бу имкониятдан фойдаланиб, биз давлат энергетика компаниясини сотиб олишга қарор қилдик", – дея "Equnico" гуруҳи президенти Кшиштоф Длугош сўзларидан иқтибос келтирилган мақолаларда.

Польшалик инвестор, шунингдек, Ўзбекистонни иқтисодий жиҳатдан хавфсиз мамлакат, деб таърифлаган. "Бу ерда арзон ишчи кучи ва энергиядан фойдаланиш имконияти таъминланган. Солиқ даражаси эса паст. Энг асосийси – инвестицияларнинг юқори рентабеллиги, бу ўз навбатида бутун лойиҳанинг самарадорлигини кафолатлайди. Яна бир муҳим жиҳат, Ўзбекистон энергетика тизимини модернизация қилиш дастури асосида, "яшил" энергияга ўтишга алоҳида урғу бермоқда", – дейилган материалларда.

Қайд этилишича, Ўзбекистон қуёш ва шамол электр станцияларини қуришга жуда катта инвестицияларни жалб қилмоқда.

"Бундан ташқари, Ўзбекистон бой табиий ресурсларга, ёш аҳолига ва кўплаб мамлакатлар орзу қила оладиган юқори туғилиш даражасига эга. Биргина ўтган йилнинг ўзида бу 37 миллионлик мамлакатда деярли бир миллион бола туғилди. Буларнинг барчаси Ўзбекистонни кўп йиллар давомида жадал ривожланиш кутаётганини англатади ва Польша компаниялари бу имкониятни қўлдан бой бермасликлари керак", – деб ёзилган Польша ОАВ тарқатган мақолалар интиҳосида.