АЛ-КУВАЙТ, 20 ноябрь. /"Дунё" АА/. Ўзбекистон элчихонаси кўмагида Кувайтнинг "AlJaber Group Holding", "Biomedix Medical Group Co.", "Advanced Medical German Co.", "Gulf Care General Trade.Co" (GCС) сингари йирик компаниялари вакилларининг Сирдарё вилоятига бизнес миссияси ташкил этилди, деб хабар қилмоқда "Дунё" АА мухбири.

Ўзбекистон элчихонаси маълумотига кура, сафар чоғида Сирдарё вилояти ҳокимининг савдо-иқтисодий масалалар бўйича ўринбосари Бобур Хўжамов ва Боёвут тумани ҳокими Дилфуза Уралова билан алоҳида учрашувлар ўтказилди.

Музокаралар чоғида Сирдарё вилоятида хорижий инвесторлар учун яратилган сармоявий муҳит, ҳудуддаги мавжуд инфратузилма ҳолати, амалга оширилаётган янги лойиҳалар бўйича маълумотлар кувайтлик инвесторларга тақдим этилди.

Сирдарё вилоятининг ижтимоий-иқтисодий салоҳияти, асосий драйвер соҳалари бўлган туризм ва қишлоқ хўжалиги хусусида батафсил таъкидланди. Тиббиёт ва фармацевтика йўналишида амалга оширилаётган ишлар ва янги лойиҳаларга алоҳида эътибор қаратилди.

Шунингдек, музокаралар чоғида Боёвут тумани марказида кўп қаватли уйлар қуриш, хизмат кўрсатиш марказлари барпо этиш, тиббий лаборатория ташкил этиш, экотуризм корхоналарини очиш ва қишлоқ хўжалиги маҳсулотларини етиштириш йўналишларидаги қўшма лойиҳаларни амалга ошириш имкониятлари муҳокама қилинди.

Боёвут тумани ҳокими Дилфуза Уралова хорижий инвесторлар билан истиқболли лойиҳаларни рўёбга чиқариш икки томон учун ҳам фойдали бўлишини қайд этиб, мутасаддиларга компаниялар мутахассислари билан уларни амалга оширишнинг техник-иқтисодий томонларини ишлаб чиқиш юзасидан тегишли топшириқлар берди.

Шундан сўнг томонлар ўртасида G2B ва B2B форматларида музокаралар уюштирилди. Уларда Ўзбекистон ва Кувайт ишбилармон доира вакиллари келгусидаги шерикликнинг амалий жиҳатларини муҳокама қилинди.

Кувайт вакиллари, шунингдек, жойларга чиққан ҳолда Боёвут туманининг салоҳияти ва таклиф этилаётган лойиҳалар билан танишди.