СТОКГОЛЬМ, 8 июль. /"Дунё" АА/. Ўзбекистон элчиси сифатидаги дипломатик миссиясини якунлаган Нодир Ганиев Швеция Ташқи ишлар вазирлиги давлат котиби Ян Кнутссон томонидан қабул қилинди, деб хабар қилмоқда "Дунё" АА мухбири.

Ташқи ишлар вазирлиги давлат котиби сўнгги йилларда икки мамлакат ўртасидаги ҳамкорлик анча фаоллашгани, жумладан Стокгольмда Ўзбекистон дипломатик ваколатхонасининг очилгани, шунингдек, парламент, соғлиқни сақлаш, экология, ҳуқуқни муҳофаза қилувчи органлар ва таҳлилий доира вакиллари ўртасида ўзаро ташрифлар кўпайганини юқори баҳолади.

Ян Кнутссон икки давлат ўртасида сиёсий, парламентлараро, иқтисодий ва маданий-гуманитар йўналишларда икки томонлама ҳамкорликни ривожлантиришга қўшган ҳиссаси учун Ўзбекистон элчисига миннатдорлик билдирди ҳамда келгуси фаолиятида муваффақиятлар тилади.

Эслатиб ўтамиз, Нодир Ғаниев 2022 йилдан буён Ўзбекистоннинг янги элчихонасини Муваққат ишлар вакили сифатида бошқариб келаётган эди. 2023 йил октябрь ойида эса у Фавқулодда ва Мухтор Элчи этиб тайинланди. Швецияга жўнаб кетишидан олдин ТИВнинг Европа давлатлари ва Европа Иттифоқи институтлари билан ҳамкорлик бошқармаси бошлиғи лавозимида фаолият олиб борган. Шунингдек, 1994 йилдан буён Ташқи ишлар вазирлиги тизимида фаолият юритиб, марказий аппарат ва мамлакатимизнинг хориждаги дипломатик ваколатхоналарида турли лавозимларда ишлаган.

Ўтган йили ноябрь ойида Стокгольм шаҳрида Швеция Қиролига ишонч ёрлиқларини топшириш тантанали маросими бўлиб ўтган эди.