ТОШКЕНТ, 9 июнь. /“Дунё” АА/. Ўзбекистон ташқи ишлар вазири ўринбосари Мирвоҳид Азимов бугун Индонезия элчиси Сити Руҳаини Жуҳаятин билан учрашув ўтказди, деб хабар бермоқда “Дунё” АА мухбири.

ТИВ маълумотига кўра, мулоқот давомида Ўзбекистон–Индонезия кўп қиррали ҳамкорлигининг ҳозирги ҳолати ва истиқболли йўналишларини муҳокама қилинди. Бўлажак тадбирларни тайёрлаш масалаларига алоҳида эътибор қаратилди. Уларнинг кун тартибини аниқ лойиҳалар ва ҳужжатлар билан бойитиш, икки томонлама муносабатларни сифат жиҳатидан янги босқичга олиб чиқиш муҳимлиги таъкидланди.

Томонлар ўзаро савдо ҳажмини ошириш, экспорт ва импорт таркибини диверсификация қилиш ҳамда мавжуд тўсиқларни бартараф этиш бўйича аниқ чора-тадбирларни белгилаб олди. Кимё, фармацевтика ва қишлоқ хўжалиги соҳаларига Индонезия капиталини жалб этиш имкониятлари кўриб чиқилди.

Ҳамкорликнинг энг жадал ривожланаётган йўналишларидан бири сифатида туризм, хусусан “зиёрат туризми” алоҳида қайд этилди.

Учрашув якунида Тошкент ва Жакарта ўртасидаги ҳамкорликни икки томонлама кун тартибининг барча йўналишлари бўйича янада чуқурлаштиришга қатъий интилиш тасдиқланди.

“Дунё” АА олган сурат