СЕУЛ, 16 октябрь. "Дунё" АА/. Жанубий Кореянинг "The Korea Herald" электрон нашри "Incheon International Airport Corporation" (IIAC) компанияси Ўзбекистон пойтахти Тошкентда қурилиши бошланган янги халқаро аэропорт учун аэропортлар эксплуатацияси бўйича консалтинг хизматларини кўрсатиш бўйича шартнома имзолаганини маълум қилди, деб хабар қилмоқда "Дунё" АА мухбири.

Нашрда таъкидланишича, Янги Тошкент халқаро аэропорти лойиҳаси йирик инфратузилма ташаббуси бўлиб, Саудия Арабистонининг "Vision Invest" инфратузилма инвестиция компанияси иштирокида давлат-хусусий шерикчилик асосида ишлаб чиқилган. Ўзбекистон ҳукуматининг авиация инфратузилмасини модернизация қилиш режасининг асоси бўлган мазкур аэропорт Марказий Осиё учун ҳаво логистика маркази бўлиб хизмат қилиши кутилмоқда.

Келишувга кўра, IIAC кейинги беш йил давомида ўзининг операцион ва хизмат кўрсатиш тажрибасини Тошкент ҳудудига, жумладан, хавфсизлик, IТ инфратузилмаси, йўловчи тажрибаси ва хавфсизлик тизимлари, Инчхон жаҳон эътирофига сазовор бўлган барча соҳаларда қўллаган ҳолда кенг қамровли консалтинг хизматларини тақдим этади.

 "Ўзбекистон Марказий Осиёда транспорт марказига айланиш учун кучли салоҳиятга эга, – деди IIAC бош директори Ли Хак-Же. – Биз минтақада иккинчи ва учинчи Инчхон аеропортларини ташкил этишни мақсад қилганмиз, бу бизнинг хориждаги бизнесимизни кенгайтириш учун муҳим кўприкни қуришдир".

"IIACнинг Ўзбекистондаги фаолияти Тошкентдан ташқарида ҳам мавжуд. Шу куни компания "Урганч" аэропортини ривожлантириш бўйича "Uzbekistan Airports" АЖ билан ҳамкорликнинг асосий йўналишлари – асосий объектларни босқичма-босқич қуриш, терминаллар фаолиятини оптималлаштириш, авиакомпанияларни жалб этиш ва тижорат даромадларини оширишга қаратилган давлат-хусусий шериклик шартномасини имзолади", – дейилган мақолада.