КУАЛА-ЛУМПУР, 12 октябрь. /"Дунё" АА/. Стратегик ва халқаро тадқиқотлар институти етакчи таҳлилчиси Карим Кассим "Дунё" АА учун интервьюсида Ўзбекистон Президенти Шавкат Мирзиёевнинг 9-10 октябрь кунлари Душанбеда ўтган "Марказий Осиё – Россия" форматидаги иккинчи саммит ва МДҲ Давлат раҳбарлари кенгашининг навбатдаги йиғилишидаги иштироки ҳақидаги фикрларини билдирди:

– Малайзия нуқтаи назаридан, Президент Шавкат Мирзиёевнинг Душанбе шаҳрида бўлиб ўтган иккинчи "Марказий Осиё-Россия" саммитидаги нутқи Тошкентнинг оддий ва тўғридан-тўғри ёндашувини намойиш этди: камроқ сўзлашув, кўпроқ ҳаракат. 

Россия асосий ҳамкор сифатида эътироф этилмоқда, бироқ асосий эътибор аниқ натижаларга — савдони кўпайтиришга, транспорт, энергетика ва технологияни ривожлантиришга қаратилди. Маърузанинг бутун оҳанги амалиёт, одамлар ва бизнес учун имтиёзлар ҳақида бўлди

Яна бир муҳим жиҳат – бу прагматик курснинг Малайзияникига жуда ўхшашлигидир. Бош вазир ва Малайзия Қиролининг Россияга сўнгги ташрифлари бир хил мавзуга, яъни савдо, сармоя, қўшма ишлаб чиқариш ва технологияларга қаратилди. 

Тошкент ҳам, Куала-Лумпур ҳам ўз манфаатлари ва ўзаро манфаатлардан келиб чиққан ҳолда турли глобал куч марказлари билан алоқаларни кенгайтиришга интилмоқда. Айнан шунинг учун ҳам Ўзбекистоннинг таклифлари мантиқий ва ўз вақтида бўлди, деб ўйлайман.