БЕРЛИН, 25 октябрь. /"Дунё" АА/. "Falk-Porsche-Technik GmbH" компанияси раҳбари, Германия-Ўзбекистон ишбилармонлар кенгаши бошқарувчиси Фальк Порше "Дунё" АА учун интервьюсида Президент Шавкат Мирзиёевнинг Брюсселга буюрган ташрифи якунлари ва Ўзбекистон билан Европа Иттифоқи ўртасида имзолаган Кенгайтирилган шериклик ва ҳамкорлик тўғрисидаги битимнинг аҳамияти ҳақидаги фикрларини билдирди:

– Ўзбекистон Президентининг Бельгияга ташрифи чоғида Кенгайтирилган шериклик ва ҳамкорлик тўғрисидаги битимнинг имзоланиши Европа Иттифоқи ва Ўзбекистон ўртасида икки томонлама ҳамкорликнинг сифат жиҳатдан юқори босқичга чиққанидан далолат беради.

Ушбу битим Ўзбекистон ва ЕИ ўртасидаги доимий ҳамкорликни янада кенгайтириш ва чуқурлаштиришга қаратилган. Айниқса, ташқи ва хавфсизлик сиёсати, адлия, маълумотларни ҳимоя қилиш, миграция ҳамда терроризмга қарши кураш соҳаларини ўз ичига олади.

Албатта, биз, германиялик тадбиркорлар учун энг муҳим жиҳати – савдо ва иқтисодиёт, энергетика, транспорт, атроф-муҳитни муҳофаза қилиш ҳамда қишлоқ хўжалиги соҳаларининг ҳам ушбу битимга киритилганлигидир. Мазкур битимнинг имзоланиши бу – сўнгги 20 йил давомида Марказий Осиё ва Европа, хусусан, Ўзбекистон ўртасида амалга оширилган узоқ йиллик самарали ҳамкорликнинг натижасидир.

Шунингдек, у "Global Gateway" дастури доирасида ҳамкорлик кенгайтириш кўзда тутилган ЕИнинг Марказий Осиё стратегиясини бир қисмидир. Дастур доирасида Европа Марказий Осиё, хусусан Ўзбекистон билан ҳамкорликни 12 миллиард евро миқдоридаги маблағ билан мустаҳкамлашни кўзда тутади. Бу, албатта, Ўзбекистоннинг Европа билан иқтисодий интеграциялашуви ҳамда GPS+ дастури доирасида Европа бозорларига кириш учун муҳим қадамдир.

2023–2024 йилларда Ўзбекистон ва ЕИ ўртасидаги савдо айланмаси 8 фоизга ошиб, 6,4 миллиард еврони ташкил этган. Ўтган йиллар билан таққослаганда жуда катта ютуқ ва салмоқли натижадир. Бунинг учун биз европалик тадбиркорлар Президент Шавкат Мирзиёевга алоҳида миннатдорчилик билдиришимиз лозим, чунки айнан у яратган ижобий муҳит туфайли Германия ва умуман Европа мамлакатлари билан шундай муваффақиятли ҳамкорлик йўлга қўйилди. 8 фоизлик ўсиш – бу, албатта, катта натижа.

Энди бу битимнинг Германия учун аҳамиятига тўхталадиган бўлсак, Ўзбекистонда 25 йилдан ортиқ фаолият юритаётган тадбиркор сифатида айтишим мумкинки, ҳужжат савдо ва инвестицияларни осонлаштиради, ўзаро манфаатли сармоя муҳитини яратади. Шунингдек, бизга янада яхши бозор шароитларига эришиш имконини берадиган замонавий ҳуқуқий асос бўлиб, Германия ва Европадан янада кўпроқ компанияларнинг Ўзбекистонда фаолият юритишига имкон беради.

Ўтган 20 йил давомида олиб борилган катта меҳнатнинг натижаси бугун ўз самарасини бермоқда. Биз Президент Шавкат Мирзиёевга хорижий тадбиркорларга яратилган шароитлар учун ўз миннатдорлик билдирамиз.

Ўзбекистондаги иқтисодий ислоҳотларни Германия ҳам яқиндан қўллаб-қувватламоқда, биргина 2024-2025 йилларда мамлакат 176 миллион евро билан ўз ҳиссасини қўшди. Бу, албатта, Германия Ўзбекистонда амалга оширилаётган ислоҳотларни қўллаб-қувватлашга тайёрлиги, бизнинг Марказий Осиёга ва энг аввало, Ўзбекистонга бўлган ишончимиз рамзидир. Ушбу ҳамкорликни давом эттириш ва янада мустаҳкамлашдан мамнунмиз, албатта.