ҚОҲИРА, 24 июль. /"Дунё" АА/. Мисрлик таниқли ёзувчи ва эксперт Аҳмад Абду Тарабек  "Дунё" АА учун интервьюсида Ўзбекистон Президенти Шавкат Мирзиёев томонидан мамлакатимизда амалга оширилаётган ислоҳотларнинг самарали натижалари ҳақидаги фикрларини билдирди:

– Бугун мен Ўзбекистон халқига мамлакат бошдан кечираётган буюк юксалиш даври ҳақида мурожаат қилишдан мамнунман. Ўзбекистоннинг мустақил тараққиёт йўлини бир неча йилдан бери кузатиб бораётган инсон сифатида айтишим мумкинки, республика сўнгги йилларда, айниқса Шавкат Мирзиёев Президент этиб сайланганидан бери катта юксалишга эришди.

Ўзбекистон раҳбари ташқи сиёсатда кенг кўламли янгиланишларни амалга оширди, халқаро муносабатларни такомиллаштириш йўлида катта қадам ташлади.

Мамлакатнинг янги ташқи сиёсатида Марказий Осиё мамлакатлари билан яқин қўшничилик муносабатларини шакллантириш асосий йўналиш сифатида белгиланди. Президент Шавкат Мирзиёев Марказий Осиё халқлари ўртасидаги ҳамкорликка тўсқинлик қилаётган барча муаммоларни бартараф эта олди. Ўзбекистон минтақадаги қолган тўрт давлат билан чегарадош ягона мамлакат ҳисобланади.

Ўзбекистон раҳбарининг ташаббуси билан Марказий Осиё давлатлари раҳбарларининг мунтазам учрашувлари ўтказилиб, бу минтақага сармоя маркази сифатида дунёнинг қизиқишини оширди.

Жаҳоннинг етакчи давлатлари Марказий Осиё минтақаси билан фаол ҳамкорлик қилишга интила бошлади. "Марказий Осиё+" форматлари Европа Иттифоқи, АҚШ, Япония, Хитой, Россия, Ҳиндистон, Жанубий Корея ва бошқа тузилмалар ва давлатлар билан шаклланган.

Кўп томонлама ҳамкорлик натижасида минтақага катта ҳажмда инвестициялар кириб келди. Ўзбекистон бу жараёнда етакчилик қилмоқда. Бу иқтисодий юксалиш ижтимоий соҳаларда ҳам акс этди. Ривожланиш икки йўналишда, яъни вертикал — замонавий технологиялар ва доимий модернизация асосида ҳамда горизонтал – бутун мамлакат ҳудудларини қамраб олувчи шаклда давом этмоқда. Бу Ўзбекистон тараққиёт йўлининг муҳим жиҳатидир.

Ўзбекистон Президенти минтақада тинчлик ва барқарорликни таъминлашга, айниқса, Афғонистон муаммосига алоҳида эътибор қаратмоқда. У бу мамлакатда тинчлик ўрнатиш учун ҳамма нарсани қилди. "Афғонистонда тинчлик – Ўзбекистонда тинчлик" тамойили асосида Афғонистонда барқарорликни таъминлашга қаратилган анжуман ва саммитлар ташкил этилди.

Кўплаб халқаро ташаббуслар, жумладан, Оролбўйи минтақасини экологик инновациялар ва технологиялар ҳудудига айлантириш (ташаббус БМТ платформасида тақдим этилган) илгари сурилди.

Яна бир йирик ташаббус Марказий ва Жанубий Осиё ўртасидаги алоқаларни мустаҳкамлаш ҳам алоқаларни ўрнатиш ва ривожлантиришга қаратилган. Хивада ЮНЕСКО кўмагида минтақанинг цивилизациялар чорраҳаси сифатидаги аҳамиятини таъкидлаган халқаро форум бўлиб ўтди. Бу Ўзбекистонга сайёҳлик йўналиши сифатида қизиқишнинг ортишига сабаб бўлди.

Мен бу ютуқларни яқинда чоп этиладиган "Шавкат Мирзиёев – Янги Ўзбекистон бунёдкори" номли китобимда батафсил баён қилганман. Ушбу тажрибани араб халқларига етказиш ниятидаман. Умид қиламанки, бу китоб бошқа тилларга ҳам таржима қилинади.

Миср ва Ўзбекистон ўртасидаги тарихий алоқалар ҳақида ҳам тўхталмоқчиман. "Мисрдаги ўзбеклар тарихи" номли китобимда ўзбекистонлик саркардалар ва таниқли олимлар Мисрга келгани, жумладан, Аҳмад ибн Тулун, ал-Фарғоний ва Сайфиддин Қутуз ҳақида ёздим. Жумладан, Аҳмад ибн Тулун Қоҳира шаҳри марказида ҳозиргача мавжуд бўлган машҳур масжидни қурган. Аҳмад ал-Фарғоний Нил сатҳини ўлчовчи қурилма яратди. Хоразм заминидан келган султон Қутуз эса мўғулларнинг хавфини бартараф этиб, бутун Миср халқини муқаррар қирғиндан сақлаб қолди.

Мисрда ҳозиргача "Ўзбекия" номи билан аталувчи маҳалла мавжуд бўлиб, у чуқур тарихий алоқаларимизнинг гувоҳидир.