ИСЛОМОБОД, 3 январь. /"Дунё" АА/. Ўзбекистон элчиси Алишер Тўхтаев Ислом ҳамкорлик ташкилотининг Илмий ва технологик ҳамкорлик бўйича доимий қўмитаси (COMSTECH) бош координатори Иқбол Чоудри билан учрашди, деб хабар қилмоқда "Дунё" АА мухбири.

Мулоқот чоғида илм-технологик йўналишда ҳамкорликни кенгайтириш, ўзаро манфаатли лойиҳалар ва ташаббусларни амалга ошириш истиқболлари муҳокама қилинди.

COMSTECH бош координатори сўнгги йилларда илм-фан, инновацион технологияларни ривожлантириш ва уларни миллий иқтисодиёт тармоқларида бевосита қўллаш борасида Ўзбекистон эришаётган ютуқларни юқори баҳолаб, буларнинг барчаси давлатимиз раҳбари томонидан таълим ва инновацион ривожлантириш бўйича олиб борилаётган ислоҳотларнинг натижаси эканини эътироф этди.

"Ўзбекистон заминида етишиб чиққан буюк мутафаккирлар, қомусий олимлар ва уламоларнинг дунё илм-фанига ва ислом цивилизациясига қўшган улкан ҳиссаси ҳеч кимга сир эмас.

Ўзбекистон, хусусан мамлакат ОТМнинг юқори илмий салоҳиятидан яхши хабардормиз. Ушбу салоҳиятни халқаро платформалар орқали жаҳон илмий ҳамжамиятига намойиш қилиш муҳим. Шунга кўра COMSTECH 57 та мамлакат илмий доиралари билан ҳамкорлик учун "ноёб эшик" вазифасини ўташи мумкин", – дея қайд этди ташкилот раҳбари.

Иқбол Чоудри бошчилигидаги делегациянинг шу йилда Ўзбекистонга ташрифини ташкиллаштириб, ташриф доирасида илм-фан, олий академик таълим йўналишида ҳамкорлик истиқболларини муҳокама қилиш, ўрта ва узоқ муддатга мўлжалланган қўшма ҳаракатлар режасини ишлаб чиқиш томонлар иш жадвалига киритилди.

Ўзбекистондан етишиб чиққан буюк мутафаккирларнинг инсоният илм-фани тараққиётига қўшган ҳиссаси тўғрисида халқаро тадбирлар, уларнинг илмий меросини ўрганиш ва тарғиб қилиш мақсадида ҳамкорликда астрономия, география, физика фанларидан халқаро мусобақалар, олимпиадалар ташкил этишга, талабалар ва тадқиқотчилар учун грант дастурларини ишлаб чиқишга келишилди.