БУДАПЕШТ, 27 октябрь. /"Дунё" АА/. Жон фон Нейман университети Евроосиё маркази тадқиқотчиси Саболч Вереш "Дунё" АА учун интервьюсида Президент Шавкат Мирзиёевнинг Брюсселга буюрган ташрифи якунлари ва Ўзбекистон билан Европа Иттифоқи ўртасида имзоланган Кенгайтирилган шериклик ва ҳамкорлик тўғрисидаги битимнинг аҳамияти ҳақидаги фикрларини билдирди: 

 – Бугунги кунда Марказий Осиё глобал савдо ва энергетика эҳтиёжлари учун муҳим минтақага айланиб бормоқда. Янги келишув ҳамкорликни савдо, энергетика, рақамли инновациялар, миграция ва хавфсизлик каби 25 дан ортиқ асосий соҳаларга кенгайтиради. У аввалги келишувга қараганда анча кўп соҳаларни қамраб олади ва иккала томоннинг демократияни мустаҳкамлаш ва мамлакатлар ўртасида савдони осонлаштиришга содиқлигини намойиш этади. Бу аниқ қоидалар ва ҳимоя тизимларини ўрнатиш орқали Европа компанияларига Ўзбекистонга хавфсиз инвестиция киритишга ёрдам беради.

Аслида, ушбу келишув 450 миллион кишилик Европа Иттифоқи бозорини тўқимачилик, кимёвий моддалар, қишлоқ хўжалиги товарлари ва саноат маҳсулотлари каби ўзбек товарларига очади.

Еврокомиссия расмийлари Кенгайтирилган шериклик ва ҳамкорлик тўғрисидаги битимни Ўзбекистондаги ислоҳотлар суръатига ва ЕИнинг минтақадаги стратегик манфаатларига мос келадиган ҳамкорлик учун асос сифатида таърифлайдилар.

Ўзбекистон ўз қоидалари ва стандартларини ЕИ мамлакатлари қоидалари ва стандартлари билан мослаштирмоқда, бу мамлакатнинг Европа бизнес секторига босқичма-босқич интеграциялашувига ёрдам беради.

Бундан ташқари, "Глобал дарвоза" ташаббуси Марказий Осиёга Европа Иттифоқи молиявий воситалари орқали инфратузилма, қайта тикланадиган энергия ва хусусий сектор инновацияларини ривожлантириш учун 12 миллиард евро ажратади.

Ўзбекистондаги ислоҳотлар Германия, Нидерландия, Италия ва Бельгиядан Европа инвестицияларини кўпайтирди.

Янги келишувга кўра, Венгрия ва Ўзбекистон Европа ва Марказий Осиё ўртасидаги кўприк вазифасини ўтайди.