ВАРШАВА, 25 октябрь. /"Дунё" АА/. "Perspektywy" таълим фонди асосчиси Вальдемар Сивиньский (Польша) "Дунё" АА учун интервьюсида Президент Шавкат Мирзиёевнинг Брюсселга буюрган ташрифи якунлари ҳамда Ўзбекистон ва Европа Иттифоқи ўртасида имзоланган Кенгайтирилган шериклик ва ҳамкорлик тўғрисидаги битимнинг аҳамияти ҳақидаги фикрларни билдирди:

– Брюсселда Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги битимнинг имзоланиши икки томоннинг ўзаро манфаатли ҳамкорликни ривожлантириш бўйича аввалги саъй-ҳаракатларининг мантиқий якунидир.

Ўзбекистон ва Марказий Осиё минтақаси узоқ вақтдан бери Европа учун қизиқиш уйғотиб келган, аммо сиёсий шароитлар ҳар доим ҳам бундай ҳамкорликнинг тўлиқ салоҳиятини рўёбга чиқаришга имкон бермаган. Шу сабабли, мазкур ҳужжатнинг имзоланиши ҳозирда, ЕИ ва Марказий Осиё ривожланиш учун янги соҳалар ва шериклар излаётган бир пайтда, айниқса муҳимдир.

Таълим ва фан ушбу битим қамраб олган ҳамкорлик соҳалари қаторига кирганидан жуда мамнунман. Ўзбекистон аҳолисининг 60 фоизини 30 ёшгача бўлганлар ташкил этадиган ва аҳолиси ҳар йили миллиондан ортиқ кишига кўпаядиган мамлакатдир. Бундай ёш ва ўсиб бораётган аҳоли учун юқори сифатли таълимни таъминлаш нафақат масъулият, балки Ўзбекистоннинг ривожланиши учун улкан имкониятдир. Табиийки, бунга кенг халқаро ҳамкорликсиз эришиб бўлмайди.

Европа университетлари ҳам Европа Иттифоқидан, ҳам кенгроқ Европа олий таълим ҳудудидан бу мақсадга эришишда шерик бўлиши мумкин. Халқаро талабалар алмашинувини муваффақиятли ривожлантиришнинг муҳим шарти, албатта, университетлар ўртасидаги илмий ҳамкорлик, жумладан, Ўзбекистон ва Европа Иттифоқи "Horizon Europe" каби халқаро тадқиқот дастурларида биргаликда иштирок этиши бўлиши керак. "Horizon Europe" доирасида грантлар олиш мураккаб вазифадир, шунинг учун Европа ва Ўзбекистон ректорлари ва тадқиқотчилари иштирокидаги дастлабки учрашувлар, конференциялар ва конгресслар жуда муҳим. Ушбу учрашувлар ўзаро ишончни ўрнатишга ва мунтазам равишда эълон қилинадиган грант танловларида муваффақиятли иштирок эта оладиган тадқиқот гуруҳларини шакллантиришга ёрдам беради.

Мен вакили бўлган "Perspektywy" таълим фонди барча манфаатдор томонларга бундай шерикликни ўрнатишда ёрдам беришга тайёр.