АР-РИЁЗ, 12 ноябрь. /"Дунё" АА/. Саудия Арабистонининг "Sahm News" электрон газетаси муҳаррири Абдулҳамид Ҳамид Абдуллоҳ ал-Кубби "Дунё" АА учун интервьюсида Ўзбекистон Президентининг АҚШга ташрифи ва Марказий Осиё мамлакатлари ва АҚШ етакчиларининг "С5+1" форматдаги саммитдаги иштироки ҳақида фикр билдирди:

– Ўзбекистон Президенти Шавкат Мирзиёевнинг Вашингтонга расмий ташрифи минтақа сиёсатида жиддий бурилиш ясади. Натижада, "С5+1" саммит якунлари бўйича умумий қиймати 105 миллиард доллардан ортиқ бўлган келишувларга эришилди.

Ўзбекистон АҚШ ва Марказий Осиё ўртасидаги ҳамкорлик форматини сезиларли даражада ўзгартирадиган ташаббусларни тақдим этди. Аслида, бу янги геосиёсий воқелик бўлиб, унда Ўзбекистон минтақадаги асосий давлат ролини мустаҳкамламоқда. Қолаверса, уран, литий ва миснинг сезиларли захираларига эга бўлган жаҳон бозорига кириш имкониятига эга бўлмоқда.

Шавкат Мирзиёев АҚШга ташрифи чоғида икки – сиёсий ва иқтисодий йўналишда иш олиб борди. АҚШ Конгресси аъзолари билан учрашувлар америкалик қонун чиқарувчиларнинг ҳамкорликни чуқурлаштириш ва Ўзбекистондаги ислоҳотларни қўллаб-қувватлашга бўлган қизиқишни оширди. Шу билан бирга, "Boeing", "General Motors", "Google", "Meta" каби йирик компаниялар билан энергетика, рақамлаштириш ва қишлоқ хўжалигига "ақлли" технологияларни жорий этиш бўйича истиқболли лойиҳаларни қамраб олган келишувлар имзоланди.

Ташрифнинг энг ёрқин лаҳзаси Оқ уйда Дональд Трамп раислигида бўлиб ўтган "C5+1" форматидаги саммит бўлди. Шавкат Мирзиёев ушбу форматда доимий фаолият юритадиган котибият тузиш, Инвестициялар ва савдо вазирларининг мувофиқлаштирувчи кенгашини таъсис этиш ҳамда Минтақавий шериклик фондини ишга туширишни таклиф қилди. Ушбу ташаббусларни жаҳон ҳамжамияти катта қизиқиш билан қарши олди.

Ташриф шуни кўрсатдики, Ўзбекистон бугунги кунда Марказий Осиёнинг шунчаки транзит маркази эмас, балки мустақил ва харидоргир ҳамкоридир. Таклиф этилаётган ташаббуслар ва имзоланган битимлар Ўзбекистон иқтисодиётини модернизация қилиш, унинг транзит салоҳиятини мустаҳкамлаш ва технологик жиҳатдан жадаллаштиришга хизмат қилади.