АНҚАРА, 29 октябрь. /"Дунё" АА/. Анқара инқироз ва сиёсат тадқиқотлари маркази – "ANKASAM" директори Меҳмет Сейфеттин Эрол "Дунё" АА учун интервьюсида "Дунё" АА учун интервьюсида Сербия Республикаси Президенти Александр Вучичнинг Ўзбекистонга давом этаётган ташрифи ҳақидаги фикрларини билдирди:

 –Ташриф икки томонлама муносабатлар учун стратегик аҳамиятга эга ва икки мамлакатнинг асосий соҳаларда амалий ҳамкорликка содиқлигини намойиш этди.

Тошкентда олий даражадаги музокаралар бўлиб ўтди, улар давомида машинасозлик, агросаноат комплекси, фармацевтика, ахборот технологиялари, рақамлаштириш, туризм ва бошқа соҳаларни ўз ичига олган Ўзбекистон-Сербия ҳамкорлигини янада ривожлантириш йўналишлари муҳокама қилинди. Маданий, гуманитар ва таълим алмашинувларига, шунингдек, уюшган меҳнат миграцияси масалаларига алоҳида эътибор қаратилди.

Имзоланган икки томонлама келишувлар тўплами иккала томоннинг ҳамкорликка прагматик ёндашувини ва келгуси йилларда аниқ лойиҳаларни амалга ошириш учун платформалар яратишини намойиш этади.

Президент Александр Вучичнинг Самарқандда биринчи марта бўлиб ўтидиган ЮНЕСКО Бош конференциясининг 43-сессиясида фахрий меҳмон сифатида иштирок этиши алоҳида эътиборга лойиқдир. Ушбу тарихий воқеа Ўзбекистоннинг тобора ортиб бораётган халқаро мавқеини ва тажриба ва билим алмашиш учун жаҳон даражасидаги платформаларни яратиш қобилиятини таъкидлайди.

Ташриф шунингдек, минтақавий ҳамкорликнинг кенгроқ контекстини акс эттиради. Бу Ўзбекистоннинг Евроосиёдаги ҳамкорлар, жумладан, Туркия билан фаол равишда кўп қиррали алоқаларни ўрнатаётганини, қўшма иқтисодий, маданий ва таълим ташаббуслари учун шароит яратаётганини кўрсатади. Ушбу ёндашув мамлакатнинг минтақавий жараёнларда ишончли ва прагматик ҳамкор сифатидаги мавқеини мустаҳкамлайди.

Президент Александр Вучичнинг ташрифи яна бир бор Ўзбекистоннинг аниқ ташаббуслар ва лойиҳаларга, Сербия билан икки томонлама ҳамкорликни чуқурлаштиришнинг янги истиқболларига ва Ўзбекистоннинг халқаро гуманитар ва маданий жараёнлардаги иштирокини кенгайтиришга қаратилган ташқи сиёсатининг самарадорлигини таъкидлайди.