ТОШКЕНТ, 14 август. /“Дунё” АА/. Бугун Олмаота метроси ташқи электр таъминоти тўлиқ узилганидан сўнг ўз фаолиятини вақтинча тўхтатди, деб хабар бермоқда “Дунё” АА мухбири “Казинформ” ХААга таяниб.

Поездлар ҳаракати соат 15:11 да тўхтатилди. Электр таъминоти тикланиб, контакт рельсига кучланиш берилгунга қадар кириш ва чиқиш учун ёпилган поездлар ва станциялардан барча йўловчилар эвакуация қилинди. Қурбонлар ва жабрланганлар йўқ.

Қозоғистон электр тармоқлари миллий оператори (КЕГОC) маълумотларига кўра, бугун Қозоғистоннинг Ягона электр энергетика тизимида технологик носозлик юз берган, шу сабабли электр узатиш линиялари ўчирилган. Энергетика мутахассислари тармоқларни тиклаш билан шуғулланмоқда.

Электр таъминотидаги узилишлар фонида Олмаотада 8 баллик тирбандликлар юзага келди ва Марказий стадион ҳудудида ҳаракатланишга қўшимча чекловлар жорий этилди.

Олмаота ҳокимлиги электр таъминотидаги узилишларга қарамай, вазият назорат остида эканини маълум қилди.

“Тиббиёт муассасалари ўз фаолиятини давом эттирмоқда. Улар захира электр манбалари – дизель генераторлари ва узлуксиз қувват манбалари билан жиҳозланган. Метрополитен иши вақтинча тўхтатилди. Электр таъминоти тикланиб, контакт рельсига кучланиш берилгунга қадар метро бекатларига кириш ва чиқиш вақтинча ёпилди”, – дейилади Олмаота ҳокимлиги хабарида.

“Казинформ” ХАА сурати