БАРНАУЛ, 10 август. /"Дунё" АА/. Ўзбекистоннинг Новосибирскдаги бош консули Аслам Акбаров Россиянинг Россиянинг Барнаул шаҳрида ҳудуд мутасаддилари билан музокаралар ўтказди, деб хабар қилмоқда "Дунё" АА мухбири.

Учрашувларда миграция, маданият ва туризм соҳасидаги икки томонлама ҳамкорлик масалалари хусусида фикр алмашилди.

Маълум қилинишича, Олтой ўлкасида уч мингга яқин Ўзбекистон фуқаролари вақтинча истиқомат қилмоқда. Бундан ташқари, Олтой ўлкасидаги меҳнат мигрантларининг 50 фоизини ҳамюртларимиз ташкил қилади. Олтой ўлкасидаги йирик корхоналарда ишлаш учун меҳнат патентларини олишда ҳам юртдошларимиз етакчи саналади.

Россия томони билан Ўзбекистон фуқароларининг Олтой ўлкасида бўлиш шартлари ва мавжуд муаммолар батафсил таҳлил қилинди.

Бош консул Аслам Акбаров ушбу ҳудуд миграция органлари Олтой ўлкаси иқтисодиёти ва қишлоқ хўжалигининг турли тармоқларида меҳнат қилаётган Ўзбекистон фуқароларининг ҳуқуқ ва манфаатларини ҳурмат қилиши муҳимлигини таъкидлади. Шу билан бирга, миграция йўналишида самарали мулоқотни давом эттиришдан ўзаро манфаатдорлик билдирилди.

Учрашувларда маданият ва туризм соҳасидаги ҳамкорликка алоҳида эътибор қаратилди. Шу йил сентябрь ойида Олтой ўлкасида Ўзбекистоннинг маданий ва сайёҳлик салоҳияти тақдимотини ўтказиш, октябрь ойида эса ўлка туризм соҳаси вакиллари учун мамлакатимизга инфо-тур ташкил этиш бўйича келишувга эришилди.