ЎШ, 15 июль. /"Дунё" АА/. Ўзбекистон Бош консулхонаси ходимлари Ўш шаҳридаги "Kiyiz Group" масъулияти чекланган жамияти раҳбари Сардор Салимов билан музокара ўтказди, деб хабар қилмоқда "Дунё" АА мухбири.

Учрашув чоғида Ўзбекистоннинг водий вилоятларида фаолият кўрсатувчи тадбиркорлари билан қўшма лойиҳаларни амалга ошириш, юртимизда "Kiyiz Group" корхонаси филиалини ташкил этиш имкониятлари муҳокама қилинди.

Корхона раҳбари Сардор Салимов Ўзбекистонда тадбиркорликни ривожлантиришга қаратилаётган катта эътибор, хусусан, хорижий инвесторлар учун яратилган қулай инвестицион муҳит ва тақдим этилаётган имтиёзлардан яхши хабардорлигини маълум қилди. У, шунингдек, Ўзбекистонда қўшма лойиҳани амалга ошириш учун ўзбекистонлик шериклар музокараларга тайёрлигини билдирди.

"Kiyiz Group" МЧЖ раҳбари билан Ўзбекистонда кигиз маҳсулотларини ишлаб чиқариш бўйича корхона ташкил этишга келишиб олинди.

Ўзбекистон Бош консулхонаси ходимлари корхонанинг маҳсулот ишлаб чиқариш жараёни, хомашё манбалари ва тайёр маҳсулотлар кўргазмаси билан танишдилар.