ҚОҲИРА, 5 февраль. /"Дунё" АА/. Ўзбекистоннинг Қоҳирадаги элчихонасида "Arma" компаниясининг халқаро ҳамкорлик менежери Аҳмад Розза билан учрашув бўлиб ўтди, деб хабар бермоқда "Дунё" АА мухбири.

Айтиш жоизки, "Arma" компанияси 1992 йилда ташкил топган бўлиб, турли хилдаги ўсимлик ёғи, сарёғ ва маргарин ишлаб чиқарувчи етакчи корхоналардан бири ҳисобланади. Корхона ўз сифатли маҳсулотлари билан АҚШ, ЕИ, Африка ва араб давлатлари бозорларига кенг кириб борган. Озиқ-овқат соҳасида нуфузли 30 га яқин халқаро ва минтақавий сифат сертификатларига эга.

Суҳбат давомида Аҳмад Розза компания ўз маҳсулотларининг хорижга экспорт кўламини ошириш, янги бозорларга чиқиш ва чет эллик ҳамкорлар сафини кенгайтиришга алоҳида эътибор қаратаётганини таъкидлади. Шу ўринда компаниянинг Марказий Осиё минтақаси давлатлари, биринчи навбатда Ўзбекистон бозорига кириб боришдан манфаатдор эканини билдирди.

Шунингдек, Аҳмад Розза бизнес учун қулай инвестицион муҳит, имтиёз ва енгилликлар яратилган Ўзбекистонни истиқболли шерик сифатида кўриши ҳамда мамлакатимиздаги турдош компания ва ишлаб чиқарувчилар билан ҳамкорлик ўрнатишга қизиқишини маълум қилди.

Компания вакили билан келгусида ҳамкорликни давом эттириш ва Ўзбекистондаги корхоналар билан алоқаларни йўлга қўйишда ёрдам кўрсатилишига келишиб олинди.