ГУАНЧЖОУ, 31 октябрь. /"Дунё" АА/.   Ўзбекистоннинг Гуанчжоу шаҳридаги Бош консулхонаси ходимлари Хитойнинг жанубий провинциялари билан ҳудудий ҳамкорликни кенгайтириш мақсадида хизмат сафари билан Хунань провинциясининг Чжучжоу шаҳрида бўлишди, деб хабар қилмоқда "Дунё" АА мухбири.

Сафар давомида провинция губернатори ўринбосари Цао Чжицян, Ташқи ишлар департаменти ҳамда Ташқи савдога кўмаклашиш ва Тижорат департаменти вакиллари билан учрашувлар ўтказилди.

Хитой томонига мамлакатимиз ҳудудларида хорижий инвесторлар учун яратилган имкониятлар, мавжуд инвестициявий муҳит ҳақида маълумот берилди.

 Чжучжоу ва Навоий шаҳарлари ўртасида ўрнатилган биродарлик алоқаларидан тўлиқ фойдаланиш, амалий қўшма лойиҳаларни ишлаб чиқиш хусусида фикр алмашилди.

Ўзаро ташрифлар доирасида эришилган келишувларни жадаллаштириш мақсадида 2025 йил биринчи ярмида Чжучжоу шаҳри мэри бошчилигидаги ишбилармон доира вакилларидан иборат делегациянинг  Ўзбекистонга ташрифини ишлаб чиқишга келишиб олинди.

Ўзбекистон дипломатлари сафар доирасида "The 3^rd International summit on BDS applications" тадбирида иштирок этди.  Унда, шунингдек,  Хитойнинг етакчи компаниялари, университетлар, илмий-тадқиқот муассасалари ва саноат бирлашмалари, шунингдек, Ўзбекистон, Россия, Лаос, Жанубий Корея, Франция Африка давлатлари вакиллари қатнашди.