ДОҲА, 2 декабрь. /"Дунё" АА/. Мамлакатимиз элчихонаси кўмагида 22-29 ноябрь кунлари "Тадбиркор аёл" Ўзбекистон ишбилармон аёллар ассоциацияси делегациясининг Қатарга хизмат сафари ташкил этилди, деб хабар қилмоқда "Дунё" АА мухбири.

Сафар давомида "Тадбиркор аёл" уюшмаси вакиллари "Qatar Businesswomen Association"да давра суҳбати, "Doha International Family Institute", "Elite Paper Industry", "Ali Bin Ali Holding" компаниялари, "View Hospital", "Korean Medical Center", "Sidra Medicine" клиникалари, "The Torch" меҳмонхонаси ва "Baladna" фермер хўжалиги ва "Istituto Di Moda Burgo" институти вакиллари билан музокаралар ўтказилди.

Шунингдек, Ўзбекистон томони Доҳада ўтказилган Барқарорлик ва тадбиркорлик бўйича 7-халқаро конференция ва "Qatar Science and Technology Park"да ташкил этилган "Сунъий интеллект" ҳафталигида иштирок этди.

 Музокаралар натижасида "Qatar Businesswomen Association" ва Ўзбекистон "Тадбиркор аёл" халқаро ишбилармон аёллар уюшмаси ўртасидаги англашув меморандуми имзоланди.

Томонлар ўртасида эришилган келишувларни ҳаётга тадбиқ этиш мақсадида "Qatar Businesswomen Association" вакилларининг Ўзбекистонга сафарини ташкил қилишга келишиб олинди.