НОВОСИБИРСК, 22 апрель. /Дунё" АА/. Ўзбекистон бош консули Аслам Акбаров Новосибирск вилояти Экспортни қўллаб-қувватлаш маркази раҳбари Алина Мусиенко билан учрашув ўтказди, деб хабар қилмоқда "Дунё" АА мухбири.

Учрашувда савдо-иқтисодий соҳадаги алоқаларнинг устувор жиҳатлари батафсил муҳокама қилинди, шунингдек, Ўзбекистон ҳудудлари ва Новосибирск вилояти тадбиркорлари ўртасидаги шерикликнинг асосий йўналишлари белгилаб олинди.

Новосибирск вилояти Экспортни қўллаб-қувватлаш маркази фаолияти экспортнинг янги йўналишларини очиш ҳамда экспорт ҳажмини оширишга қаратилган. Марказ 2013 йилдан буён Новосибирск вилояти кичик ва ўрта бизнес субъектларига товарлар, хизматлар ва технологияларнинг халқаро бозорига чиқишида кўмаклашиб келмоқда.

Марказ Ўзбекистон ҳудудлари, хусусан Фарғона ва Сурхондарё вилоятлари билан ҳамкорликни ривожлантиришга алоҳида эътибор қаратмоқда. Шунингдек, Новосибирск вилояти бизнес вакиллари томонидан ишлаб чиқарилган маҳсулотларни Сурхондарё вилоятидаги "Айритом" эркин иқтисодий зонаси орқали Афғонистонга экспортини ташкил қилишга қизиқиш билдиряпти.

Учрашув якунида жорий йилнинг июнь ойида Новосибирск шаҳрида Сурхондарё ва Фарғона вилоятлари ишбилармон доиралари вакиллари иштирокида бизнес-форум ўтказиш, октябрь ойида эса "Айритом" эркин иқтисодий зонаси ҳудудида Новосибирскда ишлаб чиқарилган маҳсулотлар кўргазмасини ташкил этишга келишиб олинди.