ХАНЧЖОУ, 6 июль. /"Дунё" АА/. Мамлакатимизнинг Шанхайдаги Бош консулхонаси томонидан Хитойнинг Чжэцзян провинцияси расмийлари билан биргаликда бизнес-симпозиум ташкил этилди, деб хабар қилмоқда "Дунё" АА мухбири.

Тадбирда провинциянинг масъул иқтисодий тузилмалари, бизнес уюшмалари ва етакчи маҳаллий компаниялар вакиллари иштирок этди. Йиғилганлар учун Ўзбекистоннинг инвестициявий имкониятлари, савдо-иқтисодий ва туризм салоҳиятига бағишланган тақдимот ўтказилди.

Унда мамлакатимизда хорижий сармоядорлар учун яратилган қулай шароитлар, солиқ ва божхона имтиёзлари, махсус иқтисодий зоналарда ишлаш имкониятлари, экспортни қўллаб-қувватлаш чоралари ва мамлакатнинг барқарор ижтимоий-иқтисодий ўсиш тенденциялари ҳақида батафсил маълумот берилди.

Ўзбекистоннинг сайёҳлик жозибадорлиги ва Хитойдан келган сайёҳлар учун соддалаштирилган шарт-шароитлар, жумладан, визасиз режим ва Хитойнинг турли шаҳарларидан тўғридан-тўғри авиарейсларнинг мунтазам равишда йўлга қўйилгани қайд этилди.

Чжэцзян провинциясида саноат, "яшил" энергетика, энергияни тежаш ва янги материаллар ишлаб чиқариш соҳалари жадал ривожланмоқда. Хитой бизнеси Ўзбекистондаги лойиҳаларда иштирок этишга, хусусан, қишлоқ хўжалиги ва сув ресурсларини тежаш соҳаларида ҳамкорлик қилишга қизиқиш билдиришди.

Анжуманда мамлакатимизда ишлаётган Хитойнинг "Holley Group" компанияси ходимлари Ўзбекистондаги тажрибалари ҳақида сўзлаб бердилар.

Тадбир якунида Чжэцзян провинцияси компаниялари вакилларидан иборат делегациянинг Ўзбекистонга бизнес-миссиясини ташкил этишга келишиб олинди.