ВЕНА, 4 декабрь. /«Дунё» АА/. Инвестициялар, саноат ва савдо вазирининг ўринбосари Бадриддин Обидов бошчилигидаги Ўзбекистон делегацияси жорий йилнинг 1 декабрь куни Венада бўлиб ўтган Савдо-иқтисодий ҳамкорлик бўйича Ўзбекистон-Австрия ҳукуматлараро комиссиясининг 8-йиғилишида иштирок этди, деб  хабар бермоқда «Дунё» АА мухбири.

Австрия делегациясига меҳнат ва иқтисодиёт вазирининг ўринбосари Флориан Фраушер бошчилик қилди.

Томонлар Ўзбекистон ва Австриянинг иқтисодий ҳамда икки томонлама муносабатларининг жорий ҳолати ҳақида маълумот алмашдилар ҳамда савдо-иқтисодий ва сармоявий ҳамкорликни ривожлантириш истиқболларини белгилаб олдилар.

Молия, туризм, тоғ-кон саноати, «яшил» технологиялар ва қайта тикланадиган энергия манбалари, инфратузилма ва транспортни ривожлантириш, соғлиқни сақлаш тизимини модернизация қилиш, қишлоқ хўжалигида ноу-хау соҳаларида ҳамкорликни кенгайтиришга алоҳида эътибор қаратилди.

Тадбирда Австриянинг ташқи ишлар, меҳнат ва иқтисодиёт, молия, қишлоқ хўжалиги вазирликлари, шунингдек, бир қатор компаниялари вакиллари сўзга чиқиб, Ўзбекистон билан ҳамкорликни янада ривожлантириш имкониятларини таъкидладилар.

Делегациялар Ҳукуматлараро комиссиянинг навбатдаги мажлисини 2024 йилда Ўзбекистонда ўтказиш тўғрисида келишиб олди. Йиғилиш якунида тегишли Баённома имзоланди.

Ўзбекистон делегациясининг ташрифи доирасида Австрия томони кўмагида ушбу мамлакат компанияларининг 100 дан ортиқ вакиллари иштирокида бизнес-форум ташкил этилди.

Австрия Иқтисодий палатаси вице-президенти Филипп Гади бизнес-форумдаги нутқида мамлакат компанияларини Ўзбекистон билан фаол ҳамкорлик қилишга чақирди. Қайд этилганидек, Австрия компаниялари билан қурилиш, тоғ-кон саноати, кимё, тиббиёт, қишлоқ хўжалиги соҳаларида муваффақиятли ҳамкорлик ўрнатилган.

Австрия компанияларининг Ўзбекистондаги иштирокини ошириш мақсадида яқин вақт ичида Тошкент шаҳрида Австрия Иқтисодий палатаси ваколатхонаси очилиши маълум қилинди, у бир вақтнинг ўзида Австрия элчихонасининг иқтисодий бўлими вазифасини ҳам бажаради.

Тадбирда Ўзбекистон Қишлоқ хўжалиги, Тоғ-кон саноати ва геология вазирликлари вакиллари ва «Ўзкимёсаноат» акциядорлик жамияти раҳбарияти томонидан қишлоқ хўжалиги, тоғ-кон ва кимё саноатининг имкониятларига бағишланган тақдимот ўтказилди. Шунингдек, молиявий маслаҳатлар беришга ихтисослашган «Urgench Cluster Group» тўқимачилик корхонаси ва «Avesta Investment Group» компанияси вакиллари тадбир иштирокчиларига ўз фаолиятлари ҳақида батафсил маълумот беришди.