ТОШКЕНТ, 2 октябрь. /"Дунё" АА/. Ўзбекистон Ташқи сиёсий тадқиқотлар ва халқаро ташаббуслар маркази директори Санжар Валиев пойтахтимизда бўлиб ўтган Ўзбекистон-Россия давра суҳбатида маъруза қилди, деб хабар бермоқда "Дунё" АА мухбири.

Давра суҳбатида эксперт Ўзбекистон ва Россия ўртасидаги халқаро ва минтақавий ташкилотлар доирасидаги ҳамкорликнинг асосий йўналишларини белгилаб берди.

Душанбе шаҳрида бўлиб ўтадиган Марказий Осиё ва Россия давлат раҳбарларининг саммити, шунингдек, МДҲ Давлат раҳбарлари кенгаши мажлисига алоҳида эътибор қаратилди. Ушбу тадбирлар кўп томонлама ҳамкорликни мустаҳкамлашнинг муҳим мезонлари сифатида белгиланган.

Нутқда МДҲнинг тармоқлараро ҳамкорликнинг норматив-ҳуқуқий базаси ва стандартлари манбаи сифатидаги аҳамияти таъкидланди. Шунингдек, Ўзбекистон фаол кузатувчи сифатида иштирок этаётган Евроосиё иқтисодий иттифоқининг интеграция жараёнларини чуқурроқ англаш имконини берувчи салоҳияти қайд этилди.

"Марказий Осиё–Россия" форматини ишлаб чиқиш минтақавий аҳамиятга молик йирик инфратузилма лойиҳаларини амалга ошириш ва келажак технологияларининг янги йўналишлари бўйича ҳамкорлик қилиш учун энг муносиб платформа сифатида қўллаб-қувватланди.

ШҲТнинг бутун Евроосиё қитъасида барқарорликни сақлаш ва ҳамкорликни ривожлантириш платформаси сифатидаги аҳамияти алоҳида таъкидланди.