АҚШ Давлат департаменти Ўзбекистондаги иккита виза компанияси раҳбарлари ва мансабдор шахсларига нисбатан қатъий виза чекловларини киритди. Тергов шуни кўрсатдики, ушбу шахслар фуқароларни, шу жумладан вояга етмаганларни Марказий Америка орқали АҚШга ноқонуний олиб киришнинг яширин йўналишларини фаол мувофиқлаштирган. АҚШ элчиси жиноий тармоқларга барҳам беришда Ўзбекистон ҳукуматининг ёрдамини юқори баҳолади.

ТОШКEНТ, 20 февраль.

АҚШ Давлат департаменти бугун Ўзбекистондан АҚШга ноқонуний иммиграцияга била туриб кўмаклашгани аниқланган шахсларга нисбатан виза чекловлари жорий этилганини эълон қилди. Ушбу чора-тадбирлар Қўшма Штатлар ва Ўзбекистон ҳукумати ўртасида минтақавий хавфсизликни мустаҳкамлаш ҳамда қонун устуворлигини таъминлаш борасидаги яқин ва давомий ҳамкорликнинг бевосита натижасидир.

Элчи Жонатан Хеник шундай деди:

«Қўшма Штатлар Ўзбекистон ҳукуматидан беҳад миннатдор. Унинг яқин ҳамкорлиги ва умумий хавфсизлик манфаатларимизга қатъий содиқлигисиз биз бу муҳим чораларни амалга ошира олмаган бўлардик. Ноқонуний миграцияга қарши курашиш ва жиноий контрабанда тармоқларига барҳам бериш борасидаги Ўзбекистоннинг фаол саъй-ҳаракатлари минтақа учун ўрнакдир. Биз ноқонуний иммиграцияга қарши курашиш ва чегара хавфсизлигини таъминлаш йўлидаги ҳамкорлигимизни давом эттириш ва янада чуқурлаштиришни интиқлик билан кутамиз.»

Ушбу чора асосан АҚШга ноқонуний иммиграция қилиш ниятида эканлигини била туриб ушбу шахсларга сафар билан боғлиқ хизматларини кўрсатган, визага кўмаклашувчи Ўзбекистондаги иккита компаниянинг раҳбарлари ва мансабдор шахсларига нисбатан қўлланилади. Бу чоралар Иммиграция ва фуқаролик тўғрисидаги қонуннинг (ИНА) 212(а)(3)(C) моддасига мувофиқ амалга оширилмоқда. Мазкур модда, фаолияти АҚШ ташқи сиёсати учун жиддий салбий оқибатларга олиб келиши мумкин бўлган шахсларнинг мамлакатга киришини тақиқлайди.

Терговлар натижасига кўра, Ўзбекистондаги мазкур шахслар АҚШга ноқонуний иммиграция қилишни мақсад қилган фуқаролар, жумладан, вояга етмаганларнинг аэропортлар ва чегаралар орқали Марказий Америкадаги транзит пунктларига етиб олишини фаол равишда мувофиқлаштирганлар. Кейинчалик бундай фуқароларнинг кўпчилиги Қўшма Штатлар ҳудудига ноқонуний киришга уринаётганда қўлга олинган.

Қўшма Штатлар миллий хавфсизлигимиз ёки иммиграция қонунларимизга путур етказадиган ҳар қандай уринишларга тоқат қилмайди. Ноқонуний иммиграциядан фойда кўзлаган шахслар салбий оқибатларга дуч келади ва биз чегараларимиз ҳамда миллий хавфсизлигимизни ҳимоя қилиш учун контрабанда тармоқларига қарши қатъий курашамиз. Қўшма Штатлар АҚШга ноқонуний иммиграцияга кўмаклашувчи жиноий тармоқларга барҳам беришдаги яқин ҳамкорлиги учун Ўзбекистон ҳукуматига ўзининг чуқур миннатдорлигини яна бир бор билдиради. Биз ҳар икки халқимизнинг хавфсизлиги ва фаровонлигини таъминлаш йўлида Ўзбекистон билан елкама-елка иш олиб бораётганимиздан фахрланамиз.