АНҚАРА, 20 февраль. /“Дунё” АА/. Туркиянинг Баликесир университети ректори, профессор Южель Оғурлу “Дунё” ахборот агентлиги учун берган интервьюсида Янги Ўзбекистоннинг замонавий тараққиёт модели ҳақида ўз фикр-мулоҳазаларини билдирди:

– Сўнгги йилларда Ўзбекистонда жадал суръатлар билан кечаётган ўзгаришлар нафақат иқтисодий кўрсаткичларда, балки жамият ҳаётининг барча жабҳаларида яққол намоён бўлмоқда. Янги Ўзбекистон воқелиги тарихий цивилизация, қулай географик жойлашув, кўп асрлик ижтимоий тотувлик институтлари ҳамда оқилона ва кўп қиррали ташқи сиёсат асосида шаклланмоқда.

Президент Шавкат Мирзиёевнинг узоқ муддатли давлат стратегияси, ички ва ташқи сиёсатдаги юксак маҳорати, жаҳон тартиботига интеграциялашувдаги очиқ ёндашуви ҳамда минтақавий кескинликни камайтиришга қаратилган тинчликпарвар йўли – бугунги Янги Ўзбекистоннинг бош омилидир. Профессионал соҳамдан келиб чиқиб, мен Ўзбекистон тараққиётини цивилизация мероси, инсон капитали ва самарали бошқарув призмаси орқали таҳлил қилишни истардим.

Ўзбекистоннинг катта бойлиги унинг тарихий ўтмишидир. Самарқанд, Бухоро ва Хива каби шаҳарлар нафақат туризм салоҳиятини оширади, балки халқаро майдонда мамлакатнинг “юмшоқ кучи” (soft power) сифатида хизмат қилади. Бир пайтлар Буюк Ипак йўлининг юраги бўлган ушбу замин бугунги кунда тарихни замонавий логистика ва савдо стратегиялари билан боғлаб, “Ўтмишдан келажакка кўприк” ғоясини муваффақиятли амалга оширмоқда. Бу ерда астрономия, математика ва тиббиёт каби фанларга асос солган буюк алломалар мероси бугунги илм-фан ва таълим сиёсатининг мустаҳкам пойдевори бўлиб хизмат қилмоқда.

Яна бир муҳим жиҳат – ижтимоий барқарорлик институти бўлган Маҳалла тизимидир. Урбанизация жараёнида кўп давлатлар бу каби тузилмаларни йўқотган бир пайтда, Ўзбекистонда маҳалла институти жамият бирдамлигини таъминловчи ноёб бошқарув воситаси сифатида сақлаб қолинди. Президент томонидан илгари сурилган “Қонун олдида ҳамма тенг” тамойили ва коррупцияга қарши қатъий кураш мамлакатнинг инвестициявий жозибадорлигини оширувчи асосий кафолатга айланди.

Сўнгги йилларда Ўзбекистон бошқа мамлакатлар учун намуна бўла оладиган ўзига хос ривожланиш моделини яратди. Бу модель тарихий ўзликни сақлаган ҳолда халқаро очиқлик ва ҳуқуқий ишончлиликни таъминламоқда.

Шахсий кузатувларим ва Ўзбекистонга ташрифларим давомида гувоҳ бўлганим шуни кўрсатадики, Янги Ўзбекистон ушбу мустаҳкам пойдевор устида келажак сари ишонч билан илгариламоқда.