ТОШКЕНТ, 8 июль. /"Дунё" АА/. Ўзбекистон Президенти Администрацияси раҳбари Саида Мирзиёева Шайх Зоид номидаги "Инсоний биродарлик" мукофотининг ҳайъат аъзоси бўлиш таклифини қабул қилди, деб хабар бермоқда "Дунё" АА мухбири.

"Шайх Зоид номидаги "Инсоний биродарлик" мукофотининг ҳайъат аъзоси бўлиш таклифини бениҳоя миннатдорлик билан қабул қилмоқдаман, – деб ёзди бугун Ўзбекистон Президенти Администрацияси раҳбари ўзининг telegram-каналида. – Ушбу мукофот низолар, тушунмовчиликлар туфайли пароканда бўлган жаҳонда меҳр-оқибат, жасорат ва бирдамлик туйғулари қанчалик ноёблигини, қанчалик таҳсинга сазовор эканлигини ёдга солади.

Одамзоднинг ёруғ келажаги ўзаро муносабатларга боғлиқлигига чин дилдан ишонадиган, жасур, узоқни кўра биладиган инсонлар билан елкама-елка фаолият юритиш мен учун шарафдир".