(2026 йил 5 октябрь, Тошкент ш.)

Ҳурматли спортчи ва мураббийлар!

Қадрли фарзандларим!

Сиз, азизларни Япониянинг Аичи-Нагоя шаҳрида бўлиб ўтган XХ ёзги Осиё ўйинларида муваффақиятли иштирок этиб, том маънода тарихий натижаларни қўлга киритганингиз билан чин юракдан самимий табриклайман.

Ватанимиз байроғини баланд кўтариб, юртимизга ёруғ юз, ёрқин ғалабалар билан қайтиб келганингиз муборак бўлсин!

Сизлар Осиё минтақасининг 45 давлатидан 11 мингга яқин спортчи иштирок этган, ғоят кескин курашлар остида ўтган ушбу нуфузли мусобақада чинакам маҳорат, жасорат ва матонат фазилатларини намоён этиб, мамлакатимиз спорти тарихида яна бир буюк саҳифа очдингиз.

Миллий терма жамоамиз 21 та олтин, 25 та кумуш ва 24 та бронза медаль билан Хитой, Япония, Жанубий Корея ва Ҳиндистон билан бирга қитъамизнинг энг кучли бешлиги сафидан жой олгани Янги Ўзбекистоннинг спорт соҳасидаги улкан салоҳиятидан, мард ва баҳодир фарзандларимизнинг қандай улуғ ишларга қодир эканидан далолатдир.

Бу, ҳеч шубҳасиз, барчамизга, кўп миллатли халқимизга чексиз ғурур бағишлайди.

Ўзбекистон ушбу ўйинларда Марказий Осиё ва Ислом ҳамкорлик ташкилоти давлатлари орасида биринчи ўринни эгаллагани ҳам таҳсинга сазовор.

Дастлаб Абдулваҳоб Рашидов каратэ, Шоҳсанам Шерзодова каноэда эшкак эшиш ва Ўткирбек Жўраев спорт гимнастикаси баҳсларида Осиё ўйинларидаги илк олтин медалларимизни олгани терма жамоамиз аъзоларини юксак марралар сари руҳлантирди, десак, муболаға бўлмайди.

Енгил атлетикачимиз Суҳроб Хўжаев босқон улоқтириш йўналишида Осиё ўйинларининг олтин медалини қўлга киритган биринчи ўзбек спортчиси бўлди.

Яна бир енгил атлетикачимиз Шарифа Давронова, боксчимиз Абдумалик Халоков икки карра, бадиий гимнастикачимиз Тахмина Икромова уч карра Осиё ўйинлари чемпиони бўлди ва қитъада тенгсиз эканини исботлади.

Академик эшкак эшиш бўйича жаҳон чемпионатида тарихий олтин медални қўлга киритган Шаҳзод Нурматов ва Собир Сафаролиев жуфтлиги Осиёда ҳам етакчиликни сақлаб қолди.

Марди майдон йигит-қизларимиз Осиё ва жаҳон рекордини янгилаб, спорт тарихига ўз номларини зарҳал ҳарфлар билан муҳрлаб қўйганлари барчамизни мамнун этади. Жумладан, афсонавий оғир атлетикачимиз Акбар Жўраев 197 килограмм натижа билан жаҳон ва қитъа рекордини янгилашга эришди.

Владимир Свечников Ўзбекистонга ўқ отиш бўйича Осиё ўйинларининг илк олтин медалини туҳфа қилди.

Дзюдочимиз Музаффарбек Тўрабоев финалда япониялик номдор рақиби Ота Ҳёгани мағлуб этиб, Осиё ўйинларида икки вазн тоифасида қўли баланд келган илк чемпион сифатида тарихга кирди.

Дзюдочи йигит-қизларимиз 2 та олтин, 2 та кумуш ва 3 та бронза медалини қўлга киритиб, дзюдо ватани бўлган Япониядан кейин умумжамоа ҳисобида иккинчи ўринни эгаллагани салмоқли натижадир.

Уч минг йиллик тарихга эга бўлган миллий курашимиз вакиллари ҳам халқимиз ишончини оқлади. Ушбу спорт тури бўйича 6 та олтин медалнинг тўрттаси бизга насиб этгани курашсевар халқимизга ўзгача ғурур бағишлади.

Юксак сабот ва шижоат кўрсатган ҳар бир спортчимизнинг номи эътирофга, эҳтиромга лойиқдир.

Мана шундай улкан ғалабалар тарихи, маҳорат мактабини яратаётган, Алпомиш ва Тўмарис ворислари бўлган ўғлонларимиз ва қизларимизга шон-шарафлар бўлсин!

Азиз дўстлар!

Осиё ўйинларидаги ҳар бир ютуқ, ҳар бир ҳаяжонли дақиқа биз учун ўзига хос байрам, завқ ва қувонч айёми эканини қарийб бир ой давомида барчамиз чин дилдан ҳис этдик.

Албатта, бепоён Осиё қитъасининг ўзига хос Олимпия ўйинлари бўлган ушбу мусобақаларда эришилган юксак натижалар ўз-ўзидан келгани йўқ. Уларнинг замирида мамлакатимизда жисмоний тарбия ва спортни ривожлантиришга қаратилган кенг кўламли ислоҳотлар, ёш истеъдод эгаларини қўллаб-қувватлаш бўйича амалга ошираётган ишларимиз мужассамдир.

Фурсатдан фойдаланиб, бизга унутилмас ғалабаларни тақдим этган барча спортчиларимизга, уларнинг ота-оналарига, олтинга тенг ўгитлари билан зафарларга муносиб ҳисса қўшган жонкуяр устоз-мураббийларга, атлетларимизни доимо қўллаб-қувватлаб турган кўп сонли мухлисларга самимий миннатдорлик изҳор этаман.

Сизлар Осиё ўйинларидаги музаффар юришингиз билан юртимизда Олимпия ҳаракати янги босқичга кўтарилгани, олтин авлод шаклланганини бутун дунёга намоён этдингиз. Зеро, Янги Ўзбекистон ёшларига беқиёс ақл-заковат баробарида улкан жасорат ва матонат ярашади.

Ишончим комил, Япония заминида тўпланган қимматли тажриба 2028 йилда Лос-Анжелесда ўтадиган Олимпия ўйинлари учун мустаҳкам замин бўлиб хизмат қилади.

Сизлар сайёрамизнинг энг нуфузли ўйинларига ҳам албатта муносиб тайёргарлик билан борасиз! Келгуси фаолиятингиз ҳам албатта ёрқин зафарларга бой бўлади!

Янги Ўзбекистоннинг буюк спорт солномасини бойитишда сизларга ҳамиша ютуқ ва омад ёр бўлсин, азиз фарзандларим!

 Шавкат Мирзиёев,

Ўзбекистон Республикаси Президенти