ТЕРМИЗ, 21 май. /"Дунё" АА/. Афғонистон ташқи ишлар вазири вазифасини бажарувчининг ўринбосари Муҳаммад Наим Вардак "Дунё" АА  учун интервьюсида 19-21 май кунлари Термиз шаҳрида ўтаётган "Тинчлик, дўстлик ва фаровонликнинг умумий маконини барпо этиш" мавзусидаги Марказий ва Жанубий Осиё ўртасидаги ўзаро боғлиқлик бўйича Термиз мулоқотининг биринчи йиғилишининг аҳамияти ҳақидаги фикрларини билдирди.

– Бундай тадбир ва мулоқотлар нафақат Афғонистон ва Ўзбекистон, балки бутун минтақа учун алоҳида аҳамиятга эга. Ташкилотчиларга ҳозирги даврдаги барча қийинчиликларга қарамай, шундай муҳим анжуманни ўтказишга муваффақ бўлганликлари учун чин дилдан миннатдорлик билдирамиз.

Ушбу муҳим мулоқотни тайёрлаш ва ўтказиш бўйича амалга оширилган кенг кўламли ишлар учун Ўзбекистонга алоҳида ташаккур изҳор этамиз. Чунки, Жанубий ва Марказий Осиё мамлакатлари ўртасидаги минтақавий ҳамкорликни мустаҳкамлаш ташаббуси юксак эътирофга лойиқдир.

Биз учун бундай мулоқотларда иштирок этиш алоҳида аҳамиятга эга. Бундан буён ҳам умумий минтақамизда ўзаро англашув, барқарорлик ва тараққиётни мустаҳкамлашга қаратилган саъй-ҳаракатларни ҳар томонлама қўллаб-қувватлашга тайёрмиз.