ХИВА, 14 июнь. /"Дунё" АА/. Кеча Хива шаҳрида бўлиб ўтган "Pahlavon Mahmud – Strongmen Games" халқаро турнири ғолибларини тақдирлаш маросими бўлиб ўтди, деб хабар бермоқда "Дунё" ахборот агентлиги.

Унда Хива шаҳар ҳокими, Туризм қўмитаси вакиллари, Халқаро Стронгмен федерацияси мутасаддилари, спортчилар, ОАВ вакиллари, блогерлар, шунингдек, кўплаб меҳмонлар ва шаҳар аҳолиси иштирок этди.

Риза Гейтаси, турнир ғолиби (Эрон):

– Бу ғалабани онамга бағишлайман. Унинг қўллаб-қувватлаши, дуолари ва чексиз севгиси мени доимо, ҳатто энг қийин дамларда ҳам олға интилишга илҳомлантиради.

Бундан ташқари, доимо мен билан бўлган, мени қўллаб-қувватлаётган устозларим, дўстларим ва барча яқинларимни алоҳида миннатдорчилик билдираман.

Ташкилотчиларга ва Ўзбекистонга ушбу ажойиб турнирда қатнашиш имконияти учун раҳмат. Ҳаммаси зўр, халқнинг қўллаб-қувватлаши энг юқори даражада эди. Агар ҳаммаси режадагидек бўлса, 2026 йилдаги кейинги мусобақага келишга ҳаракат қиламан.

Ўзбекистонлик рақибим Муҳаммад Алига алоҳида ҳурмат-эҳтиромимни билдираман. У турнирнинг сўнгги сонияларигача муносиб курашди. Бундай рақобат ҳақиқий чемпионларга хос.

Буюк Паҳлавон Маҳмуд хотирасига бағишланган турнирда иштирок этиш барчамиз учун катта шарафдир. Ишончим комилки, у авлодлари қанчалик кучли ва олижаноб бўлиб етишганини, ўз аждодларига қолдирган кураш, ҳурмат ва биродарлик руҳи сақланиб қолганини кўриб, фахрланади.

Муҳаммад Али Тўхтаматов, мусобақа совриндори (Ўзбекистон):

– Турнир юқори савияда ташкил этилди – ушбу ажойиб тадбирни ўтказишда иштирок этган барчага чин дилдан миннатдорлик билдираман. Албатта, мен ғалаба қозонишни жуда хоҳлаган эдим. Бир неча кун олдин "Яшил тепаликлар"да (Тошкент вилояти) ҳам худди шундай кучли рақиблар билан беллашиб, биринчи ўринни эгаллашга муваффақ бўлдим. Аммо, афсуски, ўшанда олган жароҳатим ўз таъсирини кўрсатди. Бугун мен оптимал формада эмасдим, афсуски, яна шоҳсупанинг энг юқори поғонасига кўтарилиш учун ҳаракатларим етарли бўлмади.

Мухлислар олдида жуда хижолатдаман. Ҳар бир жангни диққат билан кузатиб, ғалабамга чин дилдан ишонганларга ҳам катта раҳмат. Бу гал уларнинг ишончини оқлолмадим. Албатта, келгуси мусобақада мухлисларимни катта ғалабалар билан хурсанд қиламан.

Шунингдек, хоразмликларга ҳам алоҳида миннатдорлик билдираман. Уларнинг ажойиб қўллаб-қувватлаши ва илиқ кутиб олишлари мени биринчи дақиқадан сўнгги дақиқагача руҳлантирди. Улар менга нафақат куч, балки бирдамлик ҳиссини ҳам тақдим этиш. Бунинг учун уларга чин юракдан раҳмат айтаман.